Surxondaroyo viloyatining Termiz shahrida YPX inspektorini urib, unga tan jarohati yetkazgan haydovchiga jinoyat ishi qo‘zg‘atildi. Bu haqda viloyat prokuraturasi xabar berdi.
Ma’lum bo‘lishicha, 2022-yil 11-aprel kuni taxminan soat 17:30 da viloyat IIB, YHXB xodimi katta serjant A.Kamolov tasdiqlangan joylashuv taqsimotiga asosan Termiz shahar hududida o‘z xizmat vazifasini bajarayotgan bo‘lgan. YPX xodimi Termiz shahar “Bo‘ston” mahallasi Ibn-Sino ko‘chasidan Temir yo‘l bekati tomonga harakatlanib ketayotgan Nexia-3 haydovchisini to‘xtatib, harakat davomida xavfsizlik kamaridan foydalanmay kelayotgani uchun to‘xtatilganini aytib, hujjatlarini so‘ragan. Haydovchi A.J. xodimga hujjatlarini taqdim etmasdan turli xil vajlar keltirib, IIB xodimining qonuniy talabini bajarmagan.
Shunda YPX inspektori avtomashinani jarima maydonchasiga olib ketishga uringan. Biroq, haydovchi javobgarlikdan qutilish maqsadida YPX inspektoriga faol qarshilik ko‘rsatib, uning xizmat vazifasini bajarishiga to‘sqinlik qilgan. Haydovchi harakatlari davomida YPX katta inspektorining bosh, peshona va yuz sohasiga urib yengil tan jarohati yetkazgan.
Mazkur holat yuzasidan Termiz shahar prokuraturasi tomonidan tergovga qadar tekshiruv harakatlari olib borilib, 2022-yilning 12-aprel kuni haydovchini Jinoyat kodeksining 219-moddasi 2-qismi (hokimiyat vakiliga qarshilik ko‘rsatib, o‘zining xizmat vazifasini bajarishdan voz kechishga, shuningdek qonunga xilof harakatlar sodir etishga majbur qilishga urinish) bilan ayblab, qamoqqa olgan.
Izoh (0)