Сурхондарё вилоятининг Бойсун туманида содир бўлган йўл-транспорт ҳодисаси оқибатида бир киши ҳалок бўлди. Бу ҳақда вилоят ИИБ ЙҲХБ ахборот хизмати хабар берди.
Маълум қилинишича, 8 апрель куни соат 15:50 ларда «Тўда» маҳалласи ҳудудидан ўтувчи 4Р-105 автомобиль йўлининг 17-километрида 24 ёшли ҳайдовчи бошқарувида бўлган Nexia Бойсун—Термиз йўналишида ҳаракатланаётиб, эҳтиётсизлиги ва меъёридан ортиқ тезлиги оқибатида қарама-қарши йўналишга чиқиб кетган. Натижада у рўпарасидан ҳаракатланиб келаётган 26 ёшли ҳайдовчи бошқарувидаги Nexia билан тўқнашув содир этган.
Оқибатида Nexia ичида бўлган икки йўловчидан бири — 26 ёшли Н.Й. ҳодиса жойида вафот этган. 18 ёшли қиз эса оғир тан жароҳати билан тез тиббий ёрдам бўлимига олиб кетилган.
ИИБ ЙҲХБ ходимлари томонидан авария жойи ўрганилганида йўлга ажратувчи чизиқлар чизилмагани, ямаш ишлари олиб борилгани билан ҳозирги замон талабларига жавоб бермаслиги аниқланган. Бу бўйича мутасадди ташкилотлар ходимларига тегишли кўрсатмалар берилган.
Аввалроқ Тошкент вилоятида Isuzu билан тўқнашган Lada-Largus’нинг икки йўловчиси ҳалок бўлгани, Сирдарёда юк машинаси билан тўқнашган Cobalt ёниб кетгани, Қамчиқ довонида суюлтирилган газ ортилган юк машинаси бетон тўсиққа урилиб, ағдарилиши оқибатида ҳайдовчи ҳалок бўлгани тўғрисида хабар берилганди.
Изоҳ (0)