Фарғона вилоятида транспорт бошқармаси инспекторига 500 минг сўм пора таклиф қилган ҳайдовчи қўлга олинди. Бу ҳақда «Дарё»га вилоят ИИБ ахборот хизмати хабар берди.
Маълум қилинишича, 2022 йилнинг 12 апрель куни вилоят транспорт бошқармаси бўлим инспектори Э.Х. ички ишлар идораларига ариза билан мурожаат қилган. Аризада фуқаро Ж.С. Cobalt машинасида лицензиясиз йўловчи ташиш фаолияти билан шуғулланиб келаётгани бўйича аниқланган ҳуқуқбузарлик ҳолати юзасидан маъмурий баённома тузмаслик ва жавобгарликка тортмаслик эвазига 500 минг сўм пора таклиф қилганини билдирган.
Инспекторнинг аризаси асосида шу куннинг ўзида Фарғона вилоят ИИБ Коррупция ва иқтисодий жиноятларга қарши курашиш бўлими, департаментнинг Қўқон шаҳар бўлими ходимлари ҳамкорлигида тезкор тадбир ўтказилган. Тадбир давомида фуқаро Ж.С. Қўқон шаҳар Навбаҳор кўчасида Э.Х.га 500 минг сўм миқдоридаги пулларни пора тариқасида бераётган вақтида ушланган. Пуллар холислар иштирокида далилий ашё тариқасида расмийлаштириб олинган.
Мазкур ҳолат юзасидан терговга қадар текширув ҳаракатлари олиб борилмоқда.
Изоҳ (0)