Россия президенти Владимир Путин мамлакат Ғарб томонидан мисли кўрилмаган санкциялар босимига дош берганини айтди. Унинг таъкидлашича, рубль курси февраль ойининг биринчи ярмидаги даражасига қайтди. Бу ҳақда «Kommersant.ru» хабар берди.
Чакана савдо тармоқларидаги товар захиралари ҳам тикланмоқда, талаб эса нормал ҳолатга қайтди. Бироқ мамлакат кучли инфляцияга дуч келди. 8 апрелга келиб инфляция 17,5 фоизга етди. Озиқ-овқат нархи эса 9,4 фоизга ошди. Иқтисодиёт барқарорлашаётган айни вақтда ҳукумат барча ижтимоий тўловлар, пенсиялар, бюджет ходимларининг иш ҳақини ошириш бўйича янги параметрларни ишлаб чиқмоқда, – дейди президент.Путиннинг фикрича, Россиянинг узоқ муддатли молиявий барқарорлиги эндиликда мамлакат расмийларининг асосий мақсади бўлиб қолади.
Биз қўшимча ечимлар ишлаб чиқишимиз ва уларни иқтисодиёт энг зарур бўлган пайтда амалга оширишимиз керак, — деб қўшимча қилди у.Владимир Путин ташқи савдода рубль ва бошқа миллий валюталарга ўтишни тезлаштириш бўйича кўрсатма берди. Унинг таъкидлашича, янги шароитда жараён юқори суръатлар билан олдинга силжиши керак.
Давлат раҳбари, шунингдек, Россия ҳукумати озиқ-овқат нархларини тартибга солишдан воз кечиб, тўғри иш қилганини ва хусусий бизнесга самарали ечимларни топиш учун эркинлик берганини таъкидлади.
24 февралдан бери Ғарб давлатлари Украинадаги ҳарбий амалиётга жавобан Россияга қарши бешта санкциялар пакетини жорий қилди. Санкциялар банк ва ҳарбий соҳаларга, халқаро савдога, шунингдек, Россия бизнеси ва ҳукумат вакилларига таъсир кўрсатди.
Аввалроқ Россия иқтисодиёти 2022 йилда 10 фоизга қулаши ҳақида тахмин қилинган эди.
Изоҳ (0)