Россия ва Вьетнам янги халқаро ҳарбий машғулотларни ўтказади, улар давомида топшириқларни бажариш учун ностандарт ечимлар ишлаб чиқилади ҳамда мураккаб шароитда бўлинмаларни бошқариш машқ қилинади. Россия Шарқий ҳарбий округ (ШҲО) штаб-квартирасида машғулотларга тайёргарлик кўриш бўйича биринчи конференция бўлиб ўтди, деб хабар бермоқда «ТАСС» округ матбуот хизматига таяниб.
Қайд этилишича, конференция округ назорат маркази бошлиғи, генерал майор Сергей Лагуткин ва халқаро ҳарбий ҳамкорлик бошқармаси бошлиғи, полковник Иван Тараев бошчилигида ўтказилган. Вьетнам халқ армияси томонидан тадбирда ҳарбий ҳокимият офицерлари ва генерал майор Дон Дин Тхан иштирок этган.
«Шарқий ҳарбий округ штаб-квартирасида биринчи марта Россия—Вьетнам қўшма ҳарбий машғулотларини режалаштириш бўйича конференция ташкил этилди ва ўтказилди. Делегацияларнинг учрашуви видеоалоқа шаклида бўлиб ўтди. Полковник Иван Тараевнинг айтишича, халқаро ўқув машғулотларини ўтказишдан кўзланган мақсадлар қўмондон ва штабларнинг жанговар тайёргарлик операцияларини ташкил этиш ва мураккаб тактик шароитда бўлинмаларни бошқариш бўйича амалий кўникмаларини ошириш, шунингдек, топшириқларни бажаришда ностандарт ечимларни ишлаб чиқишдан иборат бўлади», — дейилади хабарда.
Шунингдек, муҳокамада машғулот номи сифатида «Континентал иттифоқ – 2022» таклиф қилинган. Музокаралар чоғида Россия ва Вьетнам томонлари бўлажак ҳарбий машғулотлар мавзуси бўйича келишиб олган ва улар ўтказиладиган сана ва жойни белгилаган. Бундан ташқари, томонлар ҳарбий хизматчиларни тиббий ва моддий-техник таъминлаш, маданий ва спорт дастурлари масалаларини муҳокама қилган.
Эслатиб ўтамиз, февраль ойида Россия ва Беларусь ҳарбийларининг «Иттифоқчилик жасорати» номли қўшма ўқув машғулотлари бўлиб ўтганди. Манёврлар Беларусдаги умумқўшин полигонларида ўтказилган.
Изоҳ (0)