Италия бош вазири Марио Драги Corriere della Sera нашрига берган интервьюсида Россия президенти Владимир Путин билан телефон суҳбатларини «фойдасиз» деб ҳисоблай бошлаганини айтди.
Драгининг сўзларига кўра, 30 март куни бўлиб ўтган сўнгги суҳбат чоғида у Путиндан можарони ҳал қилиш учун Украина президенти Владимир Зеленский билан қачон учрашишини сўраган, Россия президенти эса «ҳали вақти келмади» деб жавоб берган.
«Ўт очишни тўхтатиш бўйича музокаралар олиб боринг», — деб туриб олдим, аммо яна шу жавобни эшитдим: «Ҳали вақти келмади».
Драгининг айтишича, суҳбат якунида улар бир неча кундан кейин қўнғироқлашишга келишиб олган, бироқ ҳеч қанча ўтмай Бучада Россия ҳарбийлари томонидан кўплаб тинч аҳоли ўлдирилгани ҳақида хабарлар пайдо бўлган.
«У билан гаплашиш бефойда деганлар ҳақ, бу фақатгина вақтни беҳуда ўтказиш, деб ўйлай бошладим. Мен ҳар доим Франция президенти Эммануэль Макронни ҳимоя қилганман ва Европа Иттифоқи Кенгашининг амалдаги раиси сифатида у мулоқот учун ҳар қандай имкониятни излашда ҳақли эканини айтишда давом этаман. Лекин менга шундай туюладики, сўз ва телефон қўнғироқлари бу қирғинли уруш даҳшатларида, болалар ва аёлларга нисбатан қилинган ишларда мутлақо фойдасиз», — дея хулоса қилди Италия бош вазири.
11 апрель куни Австрия канцлери Карл Нехаммер Россияга ташриф буюриб, Путин билан музокаралар ўтказган эди. Учрашув давомида канцлер Украинадаги ҳарбий жиноятлар мавзусини кўтариб, айбдорлар жазоланиши зарурлигини қайд этган. Музокаралардан сўнг Нехаммар бу «дўстона ташриф бўлмаганини» айтиб, суҳбатни «жуда ҳам тўғридан-тўғри, очиқ ва қаттиқ» деб атаган.
Нехаммер Россия Украинага ҳужум бошлагандан бери Путин билан шахсан учрашган биринчи европалик етакчи бўлди.
Изоҳ (0)