Европарламент Франция президентлигига номзод, ултра ўнгчи «Миллий уюшма» партиясининг етакчиси Марин Ле Пен ва унинг шерикларидан 617 минг евро ундирмоқчи, деб ёзади Le Figaro. Партия аъзолари ноқонуний харажатларда, хусусан, Ле Пен 137 минг еврони ўзлаштиришда айбланмоқда.
Гап Ле Пен Европарламент аъзоси бўлган пайтда амалга оширилгани айтилаётган харажатлар ҳақида кетмоқда.
Аввалроқ Франциянинг Mediapart нашри Европа Иттифоқининг Фирибгарликка қарши курашиш бошқармаси ҳисоботига таяниб, Ле Пен ва «Миллий уюшма»нинг яна уч нафар аъзоси Европа парламенти бюджет маблағларини ўғирлашда гумон қилинаётгани ҳақида мақола чоп этганди. Унда айтилишича, маблағлар партиянинг ички мақсадлари: реклама буюмлари, шунингдек, 2014 йилда партия қурултойи учун вино харид қилиш, йўл харажатлари ва меҳмонхонада яшаш учун сарфланган. Умуман олганда, Фирибгарликка қарши кураш бошқармаси келтирган харажатлар 2007 йилдан 2014 йилгача бўлган даврга тегишли, деб ёзади Mediapart.
«Уларнинг бир неча йиллар давомида қайта-қайта қасддан қилган ва нотўғри хатти-ҳаракатлари, Европарламентдаги бурч ва масъулият даражасини ҳисобга олган ҳолда, ушбу тўрт собиқ депутатни жиддий қонунбузарликларда гумон қилиш учун етарли асосдир. Уларнинг хулқ-атвори ва қоидаларга риоя қилмаслиги жиддий қоидабузарликлари учун жавобгарликка тортилиши кераклигини англатади», — дейилади ҳужжатда. Ҳужжат судга топширилган.
Ле Пеннинг матбуот котиби Mediapart нашрига берган изоҳида, бу айбловларни рад этди ва тергов 2017 йилгача бўлган даврни ҳисобга олганига, аммо ҳисобот айнан ҳозир жамоатчилик майдонида пайдо бўлганига эътибор қаратди.
Айни пайтда Францияда президентлик сайловлари бўлиб ўтмоқда. Биринчи турда Марин Ле Пен 23,15 фоиз, амалдаги давлат раҳбари Эммануэль Макрон 27,84 фоиз овоз олганди. Сиёсатчилар иккинчи турга ўтди, унда овоз бериш 24 апрель куни бўлиб ўтади.
Изоҳ (0)