Ижтимоий тармоқларида Фарғона вилоятининг Қува туманида номаълум эркак автомобилдаги аёлга зўравонлик қилгани тасвирланган видео тарқалди. Вилоят ИИБ ҳолатга муносабат билдириб, воқеа ўрганиб чиқилганини маълум қилди.
Маълум бўлишича, 16 апрель куни фуқаро Ф.Э. (видеохабардаги аёл) Қува туман ИИБга ариза билан мурожаат қилиб, унда туман марказида ўзига тегишли автомашинада ҳаракатланиб кетаётган вақтида таниши Ф.Қ. уни тўхтатиб, ҳақорат қилгани ва автомашинаси ён ойнасини қасддан синдириб, зарар етказганини билдирган.
Мазкур ҳолат юзасидан ўтказилган терговга қадар текширув ҳаракатлари давомида фуқаро Ф.Қ. Маъмурий жавобгарлик тўғрисидаги кодексининг 183-моддасида (майда безорилик) назарда тутилган маъмурий ҳуқуқбузарликни содир этгани аниқланиб, тўпланган ҳужжатлар қонуний ҳал этишлик учун Жиноят ишлари бўйича Қува тумани судига юборилган.
Аввалроқ Тошкентда Spark йўлини тўсиб қўйган Matiz ҳайдовчиси калтаклангани, муштумзўрлар қамоққа олингани тўғрисида хабар берилганди.
Изоҳ (0)