Давлат экология қўмитаси Тошкент вилояти Тошкент туманидаги хонадонда шер боласи ноқонуний боқилаётгани ҳақида хабар берган эди. Қўмитанинг «Дарё»га маълум қилишича, шер боласи ушбу ҳудудда яшовчи 3 ёшли қизчани тишлаб олган.
«Дарё» мухбири қизчанинг холаси билан суҳбатлашиб, воқеа тафсилотларини ўрганди.
Унинг айтишича, 7 апрель куни туманнинг «Баҳор» маҳалласи Наврўз кўчасидаги уйларнинг бирида ноқонуний боқилаётган шер кечки 17:30 ларда онаси ва ҳомиладор янгаси билан дўконга сут олиш учун чиққан болага ҳужум қилган. Тўсатдан боланинг орқа томонидан келиб ташланган йиртқич қизчанинг бош ва елка қисмини тишлашни бошлаган. Она боласини шер оғзидан қутқариб қолган.
Воқеа шернинг эгалари уйдан ташқарига айлантириш учун олиб чиққан пайтда юз берган.
Ҳозирда бола Тошкент шаҳри Мирзо Улуғбек тумани 2-сон болалар жарроҳлик клиникасида даволанмоқда. Қизчада жарроҳлик амалиёти ўтказилган.
Таъкидланишича, шер эгалари қизчанинг оиласига босим қилган.
«Ҳудуд инспектори келиб, қизнинг онасидан ҳолат юзасидан тушунтириш хати ва ариза олиб кетди. Кейин бизга ҳужжатларни прокуратурага топширганини айтди. Биз ҳолатнинг босди-босди бўлиб кетишидан хавотирдамиз», — дейди қизчанинг холаси.
Ҳозирда Экология қўмитаси томонидан ҳужжатлар расмийлаштирилиб, шер боласи олиб кетилган. Ҳужжатлар ҳуқуқни муҳофаза қилувчи органлар томонидан ўрганилмоқда.
Изоҳ (0)