Украина Олий Радаси Z ва V белгиларидан фойдаланишни тақиқлаб, Россия босқинини геноцид деб тан олди

Украина Олий Радаси Россия армияси Украинага бостириб кирганда фойдаланган белгиларни тақиқловчи қонун лойиҳасини қабул қилди.

Ҳужжатга кўра, Z ва V белгилари, Россия Қуролли кучларининг рамзлари, Россия режими ва Украинадаги «ҳарбий махсус операция»нинг ҳар қандай тарғиботи тақиқланган. Ушбу рамзлардан кийим-кечак, ижтимоий тармоқлар, ОАВ, реклама, жамоат жойларида фойдаланиш мумкин эмас. Улардан «Россия режимини қоралаш мақсадида яратилган» асарларда ва Россиянинг ҳаракатини оқламайдиган ОАВ материалларида фойдаланишга рухсат этилади.

Бундан ташқари, мамлакат парламенти депутатлар Россиянинг Украинага босқинини геноцид деб тан олиш борасидаги қарорни қабул қилди.

«Путин Россияси одамларни душман бўлгани учун ўлдирмаяпти. Уларнинг этник келиб чиқиши ёки муомала тили учун эмас. Бугун украиналиклар Украина фуқаролари бўлгани учун йўқ қилинмоқда. Чунки улар шунчаки ўз ерида яшаяпти. Бугун биз расман тан олдик: Россия айни вақтда украиналикларга қарши геноцидни амалга оширмоқда. Шунингдек, биз бутун дунёни Буча, Бородянка, Ирпен, Харьков ва Мариуполдаги жиноятлар ҳақиқий геноцид сифатида тан олишга чақирамиз», — қарор матнида.

Шунингдек, Молдова парламенти ҳам учинчи ўқишда Георгий лентаси, шунингдек, Z ва V белгиларини тақиқловчи кодексга ўзгартириш киритишни маъқуллаган.

Киритилган ўзгартиришга кўра, ҳарбий ҳаракатлар билан боғлиқ бўлган атрибутлар ва белгиларни тайёрлаш, сотиш, сақлаш ва оммавий фойдаланиш учун жавобгарлик белгиланган. Ушбу тартибни бузган фуқаролар 245 доллардан 490 долларгача жаримага тортилади ёки жамоат ишларига жалб этилади, компаниялар учун эса жарима миқдори 980 долларгача етиши мумкин.

Юридик парламент комиссияси раҳбари Олеся Стаматенинг сўзларига кўра, Георгий лентаси, Z ва V белгилари Украинадаги уруш тарғиботида фойдаланилаётгани сабаб тақиқланган. Унинг қўшимча қилишича, тақиқ Георгий лентасини ҳарбий мукофотнинг бир қисми сифатида тақишга тааллуқли эмас.