Тошкент шаҳри Сергели туманида 13 апрель куни кўп қаватли бино қурилиш майдонидаги кранда ёнғин юзага келди. Бу ҳақда Фавқулодда вазиятлар вазирлиги хабар қилди.
Қайд этилишича, шу куни соат 19:04 да Сергели тумани «Ҳабибий» МФЙ Сергели 5 даҳасида жойлашган янги қурилаётган кўп қаватли бинода қурилиш ишларида фойдаланилаётган, тахминан, 25 метр баландликдаги минора кранининг кабина қисмида ёнғин содир бўлаётгани тўғрисида хабар Тошкент шаҳар ФВБга хабар келиб тушган.
Шунга кўра 3 та ёнғин-қутқарув экипажи соат 19:11 да ёнғинга етиб бориб, 19:34 да ёнғин тўлиқ бартараф этилган.
Ёнғин оқибатида тан жароҳати олган ва ҳалок бўлганлар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.
Изоҳ (0)