Ҳуқуқни муҳофаза қилувчи органлар томонидан Наманган, Тошкент ва Сирдарё вилоятларида гиёҳвандлик воситалари савдосига қарши тезкор тадбирлар ўтказилди.
Хусусан, ДХХнинг Наманган вилояти бўйича бошқармаси ходимлари томонидан вилоят ички ишлар ҳамда божхона бошқармалари билан ҳамкорликда ўтказилган тезкор тадбирда Самарқанд—Наманган йўналишида ҳаракатланаётган Lacetti автомашинаси Чуст тумани ҳудудида тўхтатилиб текширилган.
Натижада унда йўловчи сифатида кетаётган, Самарқанд шаҳрида яшовчи 54 ва 31 ёшли икки фуқаронинг ёнида 1,470 килограмм гашиш моддаси борлиги аниқланиб, процессуал тартибда расмийлаштириб олинган.
Аниқланишича, учинчи шахслар томонидан Тожикистондан Ўзбекистон ҳудудига ўтказилган ушбу наркотикларни Наманган шаҳрига олиб бориб беришлари эвазига мазкур икки фуқаронинг ҳар бирига 1 миллион сўмдан пул берилиши ваъда қилинган.
Бошқа бир ҳолатда эса Наманган шаҳрида яшовчи 44 ёшли муқаддам гиёҳванд моддалар савдоси билан боғлиқ жиноят содир этгани учун судланган шахс бошқарувидаги Lada автомашинаси вилоят марказида тўхтатилиб текширилган. Текширув давомида машина салонида 931 грамм гашиш моддаси борлиги аниқланиб, тегишли тартибда расмийлаштириб олинган.
Шунингдек, у қирғизистонлик наркокурьер томонидан Ўзбекистон ҳудудига ўтказилган мазкур гиёҳвандлик моддасини Янгиқўрғон туманида истиқомат қилувчи, муқаддам гиёҳванд моддалар савдоси билан боғлиқ жиноят содир этгани учун судланган шахсдан (1974 йилда туғилган) олгани аниқланган ҳамда у ҳам ушланган.
Наманган шаҳридаги автотураргоҳлардан бирида 38 ёшли маҳаллий фуқаро 1 568 дона «Регапен» кучли таъсир қилувчи дори воситаларини 1600 долларга сотаётган вақтида қўлга олинган.
ДХХ ходимлари томонидан божхона органлари ходимлари билан ҳамкорликда Тошкент шаҳрида ҳам бир нечта тезкор тадбирлар ўтказилган. Хусусан, Сурхондарё вилоятида яшовчи 32 ва 30 ёшли икки фуқаро 496 грамм гашиш моддасини келгусида сотиш мақсадида Тошкент шаҳрига олиб келган вақтида Чилонзор туманида ушланган.
Яшнобод туманида ўтказилган тезкор тадбирда 31 ёшли фуқаро 1680 дона «Регапен» кучли таъсир қилувчи дори воситаларини 30 миллион сўмга, Бектемир туманида қайд этилган ҳолатда эса муқаддам судланган шахс 133 дона «Регапен» ва 43 дона «Тропикамид» кучли таъсир қилувчи дори воситаларини 12 миллион сўмга сотаётган вақтида қўлга олинган.
Сирдарё вилоятида ўтказилган тезкор тадбирда эса Фарғона—Сирдарё йўналишида ҳаракатланиб келаётган, Гулистон шаҳрида яшовчи 31 ёшли шахс бошқарувидаги Gentra автомашинаси «Сайхунобод» ЙПХ масканида тўхтатилиб текширилган. Текширув давомида 242 дона «Тропикамид» кучли таъсир қилувчи дори воситаси ҳамда Ўзбекистонда муомаласи чекланган наркотик моддалар туркумига кирувчи 78 дона «Трамадол» дори воситаси борлиги аниқланиб, тегишли тартибда расмийлаштирилиб олинди.
Шунингдек, тезкор тадбир давом эттирилиб, автомашинада йўловчи сифатида кетаётган, муқаддам судланган 30 ёшли шахснинг Гулистон шаҳридаги яшаш манзилидан 406 дона «Регапен» ва 56 дона «Тропикамид» кучли таъсир қилувчи дори воситалари олинди.
Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
Аввалроқ Бўстонлиқдаги «Бочка»да психотроп модда сотувчи икки киши қўлга тушгани, ДХХ Тошкентда нарколаборатория ташкил қилган икки кишини ушлагани, Сурхондарёда картошка ичига яшириб олиб ўтилаётган 154 кг гашиш тўхтатиб қолингани тўғрисида хабар берилганди.
Изоҳ (0)