Марсело, Карим Бензема ва яна уч футболчи «Севилья»га қарши ўйинда «Реал»га ёрдам беролмаслиги мумкин

«Реал» ҳимоячиси Марсело Чемпионлар Лигаси чорак финал жавоб баҳси доирасида «Челси»га қарши кечган ўйинда (2:3) жароҳат олди.

Marca нашрининг хабар қилишича, бразилиялик ҳимоячи чап оёғида оғриқ ҳис қилган ва якшанба куни «Севилья»га қарши кечадиган ўйинни ўтказиб юборади. Футболчи пайшанба куни чуқурлаштирилган тиббий кўрикдан ўтказилади ва шундан кейин унинг жароҳати қай даражада жиддий экани маълум бўлади.

Марсело «Челси»га қарши ўйинда Ферлан Мендининг ўрнига майдонга тушганди. Менди ҳам мушакларидаги муаммо сабаб бу ўйинда охиригача ҳаракат қила олмаган. Ферлан жароҳат сабаб «Хетафе»га қарши баҳсни ўтказиб юборганди. Унинг ҳам «Севилья»га қарши ўйинда майдонга тушиши сўроқ остида қолмоқда.

Шунингдек, Карим Бенземанинг ҳам ҳолати барқарор эмас. Французнинг мушаклари «Челси»га қарши баҳснинг сўнгги дақиқаларида юкламаларга бардош беролмаган. Яна, ҳимоячи Начо ҳам қўшимча текширувдан ўтиши кераклиги айтилмоқда.

Шу тариқа «Реал» Ла Лигадаги таъқибчисига қарши ўйинда номинал чап қанот ҳимоячисиз қолмоқда. Ушбу позицияда тўп сурадиган Мигел Гутеррес ҳам тиззасидаги жароҳат боис 1,5 ойга сафдан чиққан.