Бухоро вилоят ИИБ ахборот хизмати «Махсустранс» машинаси она-бола ўлимига сабаб бўлгани ҳақида хабар берганди. Кейинчалик хабарга аниқлик киритган ИИБ уларнинг она-бола эмаслигини қўшимча қилди. «Дарё» мухбирининг аниқлашича, воқеа жойида яна бир бола бўлган.
«Кеча, 12 апрель куни соат 09:30 да менга қўнғироқ қилишиб, фожиали ҳолат содир бўлгани ҳақида хабар беришди. Бизнинг тизимда бундай ачинарли ҳолат ҳеч қачон содир бўлмаганди. Тўғриси, музлаб қолдим. ‘Аҳоли Транс’ МЧЖ га қарашли Shacman русумли чиқинди ташиш автомашинасини ‘Махсус автохўжалик’ МЧЖга ижарага олган эдик. 62 ёшли ҳайдовчи Н.Ч. соҳада 40 йилдан буён ишлаб келган. Ишлаш тажрибасини билганимиз учун ҳам айнан шу ҳайдовчини танлаган эдик», — дейди «Махсус автохўжалик» МЧЖ раҳбари Алишер Назаров.Алишер Назаровнинг сўзига кўра, ҳайдовчи автомашинани Бухоро шаҳар «Истиқлол» маҳалласи бўйлаб бошқариб бориб, ушбу кўчадаги 84/1-сонли кўп қаватли уйнинг орқа томонида жойлашган чиқиндихонадан чиқиб кетаётган бўлган.
Аҳолининг айтишича, автомашина бурилаётганда ахлатхона контейнери ортидан кутилмаганда қиз ва бола чиқиб қолган. Ҳамда бахтсиз ҳодиса содир бўлган.
Бухоро вилоят ИИБнинг Telegram-каналида бахтсиз тасодиф туфайли вафот этганлар дастлаб она ва бола экани маълум қилинди. «Дарё» мухбирининг аниқлик киритишича, боланинг онаси дейилаётган марҳума холасининг уйига меҳмонга келган 25 ёшли, ҳали турмушга чиқмаган Н.Й. бўлган. У бир ярим ёшли жияни А. ҳамда беш ёшли жияни М.ларни етаклаб, ахлат тўккани чиққан бўлган. Қизалоқ болалар аравасида бўлгани сабабли Н.Й. у билан ахлатхона контейнери яқинигача борган ва ҳар иккиси ҳам автомашина ғилдираги остида қолиб кетган. Тасодиф туфайли беш ёшли М. ортга қайтган ва воқеа жойидан қочиб қолган.
«Автотранспорт воситасини бошқаришда кўринмас ҳудуд деган термин бор. Ҳар қандай вазиятда ҳам автотранспорт бошқарувчиси хавфсизлик қоидаларига тўла риоя қилган ҳолда ҳаракатланиши шарт. Ҳайдовчи неча йиллик тажрибага эга бўлса ҳам, у кўп сонли аҳоли яшаш манзилларида хизмат кўрсатади. Чиқиндихоналарга ҳар дақиқада аҳоли кириб-чиқиши эҳтимоли борлигини билган ва англаган ҳолда транспорт воситасини бошқариши ва бошқарув қоидаларига қатъий риоя қилиши шарт эди. Мана шу эҳтиётсизлиги оқибатида икки ота-онанинг бир умр доғда қолишига сабаб бўлди», — дейди вилоят ИИБ ахборот хизмати раҳбари Шуҳрат Жалолов.
Изоҳ (0)