Олий ўқув юртида таҳсил олиш ва яшаш мақсадида хорижга кетаётган ўзбек ёшлари тобора кўпайиб бормоқда. Ҳатто айрим санъаткорларнинг фарзандлари ҳам шундай истак билан чет элга йўл олмоқда. «Дарё» зурриёти хорижда ўқиган ёҳуд ўқиётган машҳурларни бир саҳифага жамлади.
Гавҳар Зокирова
Ўзбекистонда хизмат кўрсатган артист Жамшид Зокиров ва Ўзбекистон халқ артисти Гавҳар Зокироваларнинг тўнғич фарзанди Жавоҳир 1990—1994 йилларда Москвадаги Бутунроссия давлат кинематография институти(ВГИК)да таҳсил олган. Асосан салбий роллари орқали танилган актёр Россия, Туркия, Қозоғистон каби бир қанча мамлакат режиссёрлари билан ҳам ҳамкорлик қилади.
Рашид Холиқов
Ўзбекистонда хизмат кўрсатган артист Рашид Холиқовнинг иккинчи ўғли Ислом Испанияда ўқиган. У ҳозирда Тошкентда фаолият юритади.
«Ўғлим ва келиним бошида хорижда қолиб, яшаймиз дейишганди. Аммо ундай бўлмади. Тўрт йил чет элда ўқиб, билимини Ўзбекистон ривожи учун ишлатмоқда ва бундан жуда хурсандман. Ислом ҳозирда катта бир компанияда ишлайди.
Тўнғичим Санжар Хитойдаги ўқишини ташлаб, Тошкентга қайтган. Ўзини мусиқада синаб кўрди, бир қанча қўшиқлар айтди. Кейин соҳасини ўзгартирди. Учинчи фарзандим Тимур айни пайтда инглиз тили бўйича ўзимизда ўқийди, иккинчи босқич талабаси. Учинчи курсдан ўқишини Лондонда давом эттирмоқчи», — дейди хонанда.
Юлдуз Ҳамидова
«Темир аёл», «Тангалик болалар», «Чавандоз», «Туташ тақдирлар» каби фильм ва сериаллардаги роллари билан танилган Ўзбекистонда хизмат кўрсатган артист Юлдуз Ҳамидованинг фарзандлари иккита мамлакатда таҳсил олган. Унинг саккиз йилдан бери Американинг Лос-Анжелес шаҳрида яшаётганига ҳам айнан қизлари сабабчи бўлган.
«Эгизак қизларим Фотима ва Зуҳрага ёшлигидан инглиз тилини ўргатганман. Улар Тошкентда инглиз тилини чуқурлаштириб ўргатиладиган мактабни тамомлагач, хорижда ўқишни давом эттиришни исташди. Аввал Малайзияда, кейин АҚШдаги олий ўқув юртларида ўқишди. Америкага қизларим билан келганман.
Уларга қўшилиб мен ҳам талаба бўлдим. Лос-Анжелесдаги коллежда таҳсил олдим. Шуни айтишим керакки, таълим олиш учун ҳеч қачон кеч бўлмас экан. Ўқишда молиявий томондан ёрдам беришади, ҳам тил ўрганаман. Инглиз тилини жуда яхши биламан, деб айта олмайман», — дейди актриса.
Раъно Зокирова
«Водиллик келин», «Ёдгор», «Масхарабоз» сингари кўплаб фильмлардаги роллари билан машҳурликка эришган Ўзбекистонда хизмат кўрсатган артист Раъно Зокирова тўнғич ўғлини Россияда ўқитган. Фарзанди Умид Санкт-Петербургда санъат соҳасида билим олган.
Зулхумор Мўминова
Ўзбекистонда хизмат кўрсатган артист Зулхумор Мўминованинг ёлғиз фарзанди Умид Россияда таҳсил олган ва ҳозирда ўша ерда яшайди.
«Ўғлим Москва давлат туризм университетида ўқиган. Айни пайтда Россиядаги нуфузли банкларнинг бирида веб-дизайнер бўлиб ишлайди. Унинг ютуқлари, ҳаракатидан ҳамиша қувонаман. Чунки фарзандимнинг мендан бошқа қўллаб-қувватлайдиган ҳеч кими йўқ.
Она сифатида олий ўқув юртида ўқиб, бирор касб эгаси бўлишида ёрдам бердим, қўлимдан келгани шу бўлди. Ўз соҳасида яхши мутахассис сифатида эътироф этилаётгани бу унинг изланиш ва меҳнатларининг самараси, ўзининг ютуғи», — дейди Зулхумор Мўминова.
Собиржон Мўминов
Ўзбекистонда хизмат кўрсатган артист Собиржон Мўминовнинг фарзанди АҚШдаги олий ўқув юртига ўқишга киргани боис оиласи билан океан ортига кўчиб кетишга қарор қилган.
«Ўғлим Америка ва Германиядаги олий таълим муассасаларига ҳужжат топшириб, бир неча университетга ўқишга кирди. Кейин Американи танлади. Оилага, фарзанд тарбиясига қаттиққўл, талабчан бўлганим учун ўғлимни бир ўзини жўнатгим келмади. Шундай қилиб бир куни «Мен Green Card тўлдираман, чиқади, ҳаммамиз бирга кетамиз», деди. Рози бўлдим, лекин чиқади, деб ўйламадим. Бир куни ўғлим келиб, «Ада суюнчи беринг, Green Card чиқди, энди ҳаммамиз Америкага бирга кетамиз», деб қолди. Шундан кейин Муҳиддин Қориёқубов номидаги филармониядан зўрға жавоб олиб келдим.
Мен бутун умр давлатнинг ишида ишлаганман. Ҳар доим ишни биринчи ўринга қўярдим. Ўғлим алдаб-сулдаб Америкага олиб келиб олди. «Green Card’ни оласиз-у, кейин орқага қайтасиз», деганди. Йўқ, Green Card’ни ўзига яраша қонун-қоидалари бор экан, қачон киришингиз, қачон чиқишингиз белгилаб қўйилган экан. Бу нон-туз, насиба. Мана, болалар ўқишяпти. Мен эса шу ерда концерт ва тўй тадбирларини ўтказишни ташкиллаштирувчи компания очганман. Қўлдан келгунича ўзбек миллий эстрада санъатини АҚШда намойиш этиб келмоқдаман», — дейди Собиржон Мўминов.
Аъло Раҳимова
«Оташ», «Отмагай тонг», «Боролмадим» каби қўшиқлари билан ўрта ёш вакилларига таниш хонанда Аъло Раҳимова ҳам қизи туфайли хорижга кетишга мажбур бўлди. Чунки унинг фарзанди Шодиябегим Мирзатиллаева Туркиядаги университетлардан бирининг талабаси.
«Қизим ўтган йили мактабни тамомлаб, Истанбул университетига онлайн ҳужжат топширганди. Омади келиб, талабаликка қабул қилинди. Очиғи, 18 яшар қизни ёлғиз чет элга жўнатишга қўрқдим. Хорижда ўқиб нима қиласан, деб қароридан қайтармоқчи ҳам бўлдим. Аммо кун келиб ўзим истаган олийгоҳда ўқитмагансиз, деб армон қилмасин деб, у билан Туркияга келдим.
Бу қарорни осонликча қабул қилганим йўқ. Чунки қизимга ҳам ота, ҳам онаман. Ўзбекистонда оддий давлат ишида ишлайдиган ходим бўлганман. Анча йиллардан буён тўй хизматларига чиқмаслигимни яқинларим яхши билишади. Илгари ҳам мусофирликни бошдан ўтказиб, Андижондан Тошкентга келиб, ўрнимни топганман. Аммо у вазият билан хорижга келиш ўртасида фарқ бор экан. Ҳозир пулни тежашга кўпроқ ҳаракат қиляпман. Негадир одамлардан «Тошкентдаги уйингизни сотиб келдингизми?», деган гапни кўп эшитяпман. Йўқ, уйимни сотганим йўқ. Ватанимда ҳам бир кулбам бўлиши керак. Айни кунларда уй сотиш ҳақида эмас, Истанбулдан кичикроқ бўлса-да, уй олиш ҳақида ўйлаяпман», — дейди хонанда.
Гули Асалхўжаева
Хонанда Гули Асалхўжаеванинг иккинчи ўғли Жавоҳир Хўжаев Туркиядаги олий ўқув юртида ўқийди. Актёрлик бўйича таҳсил олаётган Жавоҳир айни пайтда иккинчи босқич талабаси.
Изоҳ (0)