Наманганда йўл ёқасида жойлашган мактаблар яқинида қуёш батареялари ёрдамида ишлайдиган кўчма светофорлар ўрнатилмоқда. Бу ҳақда «Дарё» мухбири Азизбек Абдувалиев хабар бермоқда.
Наманган вилоят ИИБ ЙҲХБ Йўл ҳаракатини ташкил этиш бўлинмаси муҳандиси Раҳмиддин Сирожиддиновнинг маълум қилишича, вилоятда 2021 йили 1082 та йўл-транспорт ҳодисаси содир бўлган. Уларнинг 50 фоиздан ошиғи пиёдалар иштирокида рўй берган.
Бундай ҳолатларнинг олдини олиш мақсадида тегишди чора-тадбирлар белгиланган. Ушбу чора-тадбирлар доирасида Наманган шаҳар ҳокимлиги ташаббуси билан вилоят марказига «ақлли» светофорлар келтирилди.
«Уларни биринчи галда таълим муассасалари ёнида ўрнатишга қарор қилинди. Чунки ЙТҲлар жабрдийдалари ва қурбонлари орасида, афсуски, болалар ҳам оз эмас. Ҳозиргача гавжум йўл ёқасида жойлашган 5 та мактаб атрофида шундай светофорлар ўрнатилди. 2022 йил охирига қадар бундай мактаблар сони 23 тага етади», — дейди Раҳмиддин Сирожиддинов.
Қуёш панели ёрдамида ишлайдиган мобил светофорлар электр энергияси таъминотида узилишлар кузатиладиган жуда қулай. Қолаверса, стационар светофорлардан қарийб уч баравар арзон.
«Бундай светофор дастлаб бизнинг мактаб олдида ўрнатилди. Бундан миннатдормиз, чунки атрофимизда автомобиллар ҳаракати анча гавжум. Олдинлари ўқувчилар мактабга келадиган пайт кўчага навбатчи чиқаришга мажбур эдик. Ўқувчилар тўла-тўкис синфларига кириб кетгунича хавотирда турардик. Энди бу хавотирлар ортда қолади деган умиддамиз», — дейди Наманган шаҳридаги 51-умумтаълим мактаби директор ўринбосари Гулбаҳор Ғаниева.
Ҳозирча Наманган шаҳрида йўлга қўйилган ушбу янгиликни келгусида вилоятнинг бошқа шаҳар-туманларида ҳам жорий этиш режалаштирилмоқда.
Изоҳ (0)