«Davrbank» томонидан фуқароларнинг банк картасидаги пул маблағлари уларнинг рухсатисиз ечиб олингани аниқланди. Марказий банк матбуот котибининг маълум қилишича, Банк хизматлари истеъмолчиларининг ҳуқуқларини ҳимоя қилиш хизматига бу борада мурожаатлар келиб тушган.
Ушбу мурожаатлар ўрганилганда кафил ёки биргаликда қарз олувчи ҳисобланмаган фуқароларнинг банк карталари қонун ҳужжатларига риоя қилинмаган ҳолда уларнинг розилигисиз тижорат банки томонидан жисмоний шахсларга ажратилган кредит қарздорлигини сўндириш учун бириктирилиб, маблағлар ечиб олиш амалиёти йўлга қўйилгани аниқланган.
Бундай амалиётни йўлга қўйган «Davrbank»ка нисбатан белгиланган тартибда жарима санкцияси қўлланилган. Шунингдек, банкка фуқароларнинг банк ҳисобварақларидан (шу жумладан, банк карталаридан) маблағларни қонунчиликка зид равишда уларнинг розилигисиз ҳисобдан чиқариш амалиётига чек қўйиш ҳамда фуқаролардан шу мазмунда шикоятлар келиб тушганда ушбу маблағларни қайтариб берилишини таъминлаш вазифалари юклатилган.
«Банк хизматлари истеъмолчиларининг ҳуқуқларини ҳимоя қилиш хизмати тижорат банкларининг инсофсиз хизмат кўрсатиш амалиётларига қарши туради ҳамда кредит қарздорликларни учинчи шахслар ҳисобидан сўндиришда амалдаги қонун ҳужжатлари талабларига риоя қилишга чақиради», — дейилади Марказий банк хабарида.
Шу билан бирга, барча тижорат банкларига «Банклар ва банк фаолияти тўғрисида»ги қонуннинг 57-моддасида банк хизматлари истеъмолчиларининг ҳуқуқлари ва қонуний манфаатлари бузгани учун банкка нисбатан чоралар кўрилиши белгилангани эслатиб ўтилган.
Тижорат банки томонидан картадан маблағлар ечилган ҳолатларда қонун ҳужжатлари билан белгиланган ҳуқуқлар бузилган деб ҳисобланса, Марказий банкнинг Банк хизматлари истеъмолчиларининг ҳуқуқларини ҳимоя қилиш хизматига ёзма равишда ёки (71) 212-60-15, (71) 212-73-80, (71) 212-60-94 телефон рақамлари орқали мурожаат қилиш мумкин.
Мавзуга доир: Марказий банк InfinBank’га нисбатан жарималар қўллади
Изоҳ (0)