Фуқаролик ҳолати далолатномаларини ёзиш органлари (ФҲДЁ) хизматидан кўпчилик, жумладан, ногиронлиги бўлган шахслар ҳам фойдаланади. Тошкент шаҳар Мирзо Улуғбек тумани ФҲДЁ биносига кириш учун ўрнатилган ногиронлар аравачаси йўлаги тўсиб қўйилганига гувоҳ бўлинди. Бу ҳолатга изоҳ олиш мақсадида «Дарё» мухбири ФҲДЁ мудири қабулида бўлди.
Мудир Луиза Маҳмудбекованинг айтишича, бино катта йўл ёқасида жойлашгани боис асосий кириш эшигидан эмас, балки орқа тарафдаги эшикдан фойдаланилади.
«Йўлак пайвандлаб беркитиб қўйилганидан хабарим йўқ. Бизга ногиронлар камдан кам ҳолларда келади. Агар келса, ўзим пастга тушиб, унинг шахсини тасдиқловчи ҳужжати билан танишиб, керакли қоғозга имзо қўйиб бераман. Бир марта 70 ёшлар атрофидаги фуқаро келганида чиқиб тушишга қийналишини айтганди. Ўшанда ўзим пасга тушиб хизмат кўрсатганман. Агар ногирон бўлган шахслар портал орқали мурожаат қилса, уларнинг уйига ҳам бориб келишимиз мумкин», – деди Луиза Маҳмудбекова.
ФҲДЁга ногиронлар учун алоҳида аравача ажратилган. Лекин ўша аравача юрадиган йўл ёпиқ. Бу мантиқсизлик ҳақидаги саволни Луиза Маҳмудбекова жавобсиз қолдирди.
Мудир мухбир билан суҳбат сўнгида ногиронлар йўлагини очиб қўйилишини айтган эди. Лекин орадан 10 кун вақт ўтган бўлса-да, йўлак ҳалигача беркитилган ҳолда қолмоқда.
«Ўзбекистон Республикасида ногиронларни ижтимоий ҳимоя қилиш тўғрисида»ги қонуннинг 9-моддасига кўра, аҳоли пунктларини лойиҳалаш ва қуриш, транспорт воситалари, алоқа ва ахборот воситаларини яратиш ҳамда ишлаб чиқаришда ногиронларнинг эҳтиёжларини ҳисобга олиш шартлиги кўрсатиб ўтилган.
Ушбу қонуннинг 10-моддасида умумий фойдаланишдаги транспорт, алоқанинг, ахборотнинг ишлатилаётган воситалари ҳамда ижтимоий инфраструктуранинг бошқа объектлари (8 ва 9-моддалар) давлат ҳокимияти ва бошқаруви идоралари томонидан ногиронларнинг жамоат бирлашмалари иштирокида белгилаб қўйиладиган тартибда ва шартларда ногиронлар кириши ва фойдаланиши учун мослаштирилиши зарурлиги кўрсатиб ўтилган. Мазкур объектларни ногиронлар кириши учун мослаштириш мумкин бўлмаган ҳолларда тегишли корхоналар, муассасалар ва ташкилотлар томонидан ногиронларнинг эҳтиёжлари қондирилишини таъминлайдиган зарур чоралари ишлаб чиқилиши ва амалга оширилиши керак.
Агар шундай талаблар бажарилмаса, Маъмурий жавобгарлик тўғрисидаги кодекснинг 511-моддасига кўра, ногиронлар ижтимоий инфратузилма объектларига тўсқинликсиз кириши учун, шунингдек темир йўл, ҳаво, сув, шаҳарлараро автомобиль транспортидан, шаҳар ва шаҳар атрофига қатнайдиган йўловчилар транспортининг барча турларидан, транспорт коммуникацияларидан, умумий фойдаланишдаги алоқа ва ахборот воситаларидан тўсқинликсиз фойдаланиши учун шароитлар яратиш бўйича талабларни бажармаслик — мансабдор шахсларга базавий ҳисоблаш миқдорининг ўн бараваридан ўн беш бараваригача миқдорда жарима солишга сабаб бўлади.
Изоҳ (0)