Тошкент шаҳридаги мажбурий даволаш наркология шифохонаси ходимлари мажбурий тартибда ер ағдариш ишларига жалб қилинган. Бу ҳақда «Дарё»га тиббиёт ходимларидан бири маълум қилди.
Ер ағдараётган тиббиёт ходимлари шифохонада ҳар куни шу аҳвол эканини айтмоқда.
Видеода ер ағдараётгани кўринган тиббиёт ходимларидан бири раҳбарияти топшириғидан норози бўлиб, «бош ҳамшира ва катта ҳамширанинг ер ағдариш ишларига жалб қилинганини ҳеч қаерда кўрмаганман», деса, бошқаси «ҳудуд жудаям катта — саккиз гектар, эплаб бўлмаяпти экан, шу сабаб биз ҳам бу ишга жалб қилинганмиз», дейди.
Видеода кўринган тиббиёт ходимлари шифохонадаги барча ходимлар ер ағдариш ишларига жалб қилингани сабаб беморлар назоратсиз қолганини айтиб, уларга ким қараши мумкинлигини муҳокама қилади.
Ходимлардан бири «биз беморларга қарасак, ерни ким чопади», дея савол берса, яна бир ходим эса мазкур шифохона ходимлари эътиборсиз қолмаслиги кераклигини айтади.
Ер ағдараётган тиббиёт ходимларининг ўзаро суҳбатида уларга гул экиш мажбурияти ҳам юклатилганини, энг ачинарлиси, экилиши лозим бўлган гулни ҳам ўз маблағи эвазига олиб келиши кераклиги англашилади.
«Дарё»нинг бу ҳақдаги сўровига жавоб берган Бандлик ва меҳнат муносабатлари вазирлиги ахборот хизмати раҳбари Мавжуда Мирзаева ҳолат эътиборга олинганини, тез орада айбдорларга чора кўрилишини маълум қилди. Соғлиқни сақлаш вазирлиги ахборот хизмати раҳбари Фурқат Санаев эса ҳолат уюштирилган бўлиши ҳам мумкинлигини тахмин қилиб, Тошкент шаҳар соғлиқни сақлаш бошқармаси масъуллари вазиятга аниқлик киритгач, барчаси маълум бўлишини билдирди.
«Дарё» мавзуга қайтади.
Изоҳ (0)