Toshkent metropoliteni poyezd eshiklarida kuzatilayotgan texnik nosozliklar yuzasidan yo‘lovchilarga murojaat bilan chiqdi

Toshkent metropoliteni shu kunlarda harakatlanayotgan poyezd eshiklari ochilib yopilishida texnik nosozliklar kuzatilib, yo‘lovchilar uchun bir qancha noqulayliklarni yuzaga keltirayotgani sabab fuqarolarga murojaat bilan chiqdi.

Toshkent metropoliteni o‘z murojaatida metrodan foydalanuvchi yo‘lovchilar xavfsizligini ta’minlash, eshikka tushayotgan yuklamalarni oshirmaslik, yo‘lovchilarga noqulayliklar tug‘dirmaslik maqsadida poyezd vagonlarining eshiklariga suyanmaslikni, eshiklar ochilishi va yopilishiga xalaqit bermaslikni so‘ragan.

Bundan tashqari, eskalatordan foydalanish vaqtida mavjud qoidalarga amal qilish va to‘g‘ri foydalanish lozimligi eslatib o‘tilgan.

“Metropolitenda tartib-qoidaga amal qilmaslik hamda noto‘g‘ri harakatlanish vagon eshiklari va eskalatorlarda nosozliklarning kelib chiqishi, muddatidan oldin yaroqsiz holga kelib, harakat vaqtida turli holatlar yuz berishiga sabab bo‘lmoqda. Metrodan to‘g‘ri foydalanish siz va boshqa yo‘lovchilarning o‘z manziliga xavfsiz, qulay tarzda, o‘z vaqtida yetib borishiga zamin yaratadi. Barcha yo‘lovchilarni ogohlik va ehtiyotkorlikka chaqiramiz”, — deyiladi eslatmada.

Eslatib o‘tamiz, 2021-yilning 22-sentabrida “Xalqlar do‘stligi” bekatida poyezd vagonlaridan birining eshigida nosozlik kuzatilgan va yo‘lovchilar tushirib yuborilgan, 27-sentabr kuni ham poyezdda kuzatilgan nosozlik sabab yo‘lovchilar bekatda tushirib qoldirilgandi. 2022-yilning 6-fevralida esa Toshkent metro poyezdi “Mustaqillik maydoni” bekatida to‘xtab qolgan.