Toshkent metrosining “Kosmonavtlar” bekatida poyezd yongani haqidagi xabar yuzasidan rasmiy ma’lumot berildi

Toshkent metrosining “Kosmonavtlar” bekatida poyezd vagoni yongani haqida tarqalgan xabar yuzasidan rasmiy ma’lumot berildi.

“Toshkent metropoliteni” matbuot xizmati xabariga ko‘ra, 23-dekabr kuni soat 12:10 lar atrofida ushbu bekatda 34-sonli harakat tarkibida mashinist tomonidan nosozlik aniqlandi. Shu sababli, bekatda yo‘lovchilar vagondan tushirilib, xavfsizlik choralari ko‘rildi.

Favqulodda vaziyatlar vazirligining ma’lum qilishicha, “Kosmonavtlar” metro bekati ichida harakatlanib ketayotgan 4 ta vagondan iborat tarkibning 3-vagonida texnik sabablarga ko‘ra saqlagich (predoxranitel) kuyganligi yoki tormoz kolodkasi siqib qolgani taxmin qilinmoqda.

Voqea joyida hech qanday yong‘in sodir bo‘lmagan. Nosoz vagon ta’mirlash uchun DEPOga yuborilgan.

Fuqarolar xavfsiz joyga evakuatsiya qilingan, hodisa oqibatida jabrlangan va halok bo‘lganlar yo‘q.

Voqea joyiga shahar hamda tuman FVB rahbar xodimlari va 2 ta yong‘in-qutqaruv ekipajlari jalb etilgan. Hozirda vaziyat oqibatlari bartaraf etilgan, metro odatiy ish rejimida ishlamoqda.