Австралия ҳукумати Украинага қарши қуролли тажовузда иштирок этган 67 нафар Россия фуқаросига нисбатан шахсий санкциялар қўллашга қарор қилди. Бу ҳақда Австралия ташқи ишлар вазирлиги хабар берди.
«Навбатдаги санкциялар пакети Россия томонидан Буча ва Киев атрофидаги бошқа шаҳарларда содир этилган ҳарбий жиноятларга оид далиллар пайдо бўлиши ортидан жорий этилмоқда. Австралия бу ваҳшийликларни энг кескин тарзда қоралайди», — дейилади хабарда.
Хусусан, Россиянинг Миллий мудофаа назорати маркази раҳбари, Мариупол қассоби деб аталадиган генерал-полковник Михаил Мизинсев, Россия Иқтисодий ривожланиш вазирлиги раҳбари Максим Решетников, шунингдек, бош вазир ўринбосари ва ҳукумат аппарати раҳбари Дмитрий Григоренкога санкция қўлланди. Санкциялар рўйхатидан Россия Федерал Мажлиси Давлат думаси раисининг ўринбосари Александр Бабаков ҳам бор.
Бундан ташқари, Украина Олий Радасининг IX чақириқ депутати Олег Волошин ва Мелитопол мери деб аталадиган Галина Данилченко ҳам санкциялар остида қолган.
Умумий ҳисобда, Австралия Украинадаги воқеалар муносабати билан 600 га яқин жисмоний ва юридик шахсларга нисбатан санкциялар жорий этган.
Аввалроқ Оқ уй Россия президентининг вояга етган барча қизларига нисбатан санкциялар жорий қилганди. Шунингдек, АҚШнинг санкциялар рўйхатига Россия ташқи ишлар вазири Сергей Лавровнинг рафиқаси ва қизи, 18 нафар амалдор киритилган. Улар орасида Москва мери Сергей Собянин, Россия бош вазири Михаил Мишустин ҳам бор.
Ғарб мамлакатлари Россия февраль охирида Украинада ҳарбий ҳаракатларни бошлаганидан кейин санкциялар эълон қилишни бошлаган, шунингдек, Киев вилоятидаги аҳоли яшаш пунктлари ҳамда Буча шаҳридан россиялик ҳарбийлар чиқиб кетганидан кейин минглаб тинч аҳоли вакилларининг жасадлари топилганидан сўнг Ғарбнинг Москвага нисбатан тақиқлари сони ортган. Россия расмийлари Бучадаги одамларнинг ўлимига алоқадорлигини инкор этмоқда.
Изоҳ (0)