Самарқандда аёлини ўзини ўлдириш даражасига етказган эркак 9,5 йилга қамалди

Самарқанд вилояти Каттақўрғон шаҳрида мунтазам таҳқирлаши сабабли аёлининг ўлимига сабаб бўлган эркак 9 йил 6 ойга озодликдан маҳрум қилинди. “Дарё” суд ҳужжати билан танишди.

Аниқланишича, 1995 йилда туғилган И.И. 2023 йилнинг сентябрь ойида ўзидан бир ёш катта, Андижон шаҳрида яшовчи Г.К. билан шаръий никоҳ асосида турмуш қурган. Дастлаб тинч-тотув яшаган жуфтлик икки йиллик ҳаёти давомида бир нафар қиз фарзандли бўлишган. Бироқ И.И. аёлини мунтазам равишда турмуш қуришгача бўлган даврдаги ҳолатлар бўйича айблаб, ҳақоратлаб келганидан сўнг эр-хотин ўртасида доимий жанжаллар юзага келган.

2025 йилнинг 1 июль куни Г.К. И.И.га билан бирга яшашни истамаслигини билдириб, фарзанди билан Андижонга кетишини айтган. Бу эса яна навбатдаги жанжалга сабаб бўлган. Шу куни у ўзини хона деразасидан ташлаб, юз қисмига темир чойнак билан уриб, барибир Андижонга, ота-онасининг ёнига кетишини айтиб, ўзини ҳар томонга отиб ўзига жароҳат етказган.

“Ўша куни эрталаб қизимни шифохонага олиб бориб, кўрсатиб қайтгач биргаликда ишхонанинг юкларини белгиланган манзилларга тарқатдик. Шундан кейин уйга келдик. Ҳаммаси яхши эди. Бироқ қанчадир вақт ўтгач, у ўзидан ўзи мен ота-онамникига кетаман, деди. Мен эса ўртада бола бор, қаерга кетасан, бирга яшаймиз, деб айтдим.
Аммо у менинг жавобимни бер, сен билан яшашдан, сенинг гапларингдан чарчадим, бўлди, мен ёмон аёл эканман, деб ўзини ўзи урди. Шу воқеадан кейин ота-онасига қўнғироқ қилдим. Улар билан гаплашиб бўлгач, эртасига эрталаб йўлга чиқариб юборворишни айтиб, тинчлантирдим”, деди судланувчи ўз кўрсатувида.

Орадан бир кун ўтиб, 2025 йил 2 июль куни соат тахминан 09:00 да ўртада яна жанжал кўтарилади. Эркак аёлининг кетишига қаршилик кўрсатиб, унинг эркин ҳаракатланиш ҳуқуқини чеклаган ва юз қисмига уриб, дўппослаган. Жанжал шу зайлда давом этиши оқибатида Г.К. турмуш ўртоғининг унга нисбатан бўлган муомаласи ҳамда шаъни ва қадр-қимматини муттасил равишда таҳқирлашига чидай олмасдан ўз жонига қасд қилишини билдириб, қўлидаги пичоқ билан ўзини ўлдиришга ҳаракат қилади.

“Қўлидаги пичоқни олиб қўйиш ва уни жазавасидан тушириш мақсадида орқасидан қучоқлаб, ўнг қўлини қайирдим. Аммо тортишув давомида у пичоқни ўзининг бўйнининг чап томонига санчиб олди”, деди судланувчи.

Жиноят ишлари бўйича Каттақўрғон туман суди И.И.ни Жиноят кодексининг 103-моддаси (Ўзини ўзи ўлдириш даражасига етказиш) 2-қисми “а” банди билан айбли деб топган. Унга нисбатан 9 йил 6 ой муддатга озодликдан маҳрум этиш жазоси тайинланган.