Ўзбекистонда Давлат харидлари портали ёрдамида 2021 йилда 5 триллион 786 миллиард сўм маблағ иқтисод қилинган. Бу ҳақда Сенат раиси Танзила Норбоева Коррупцияга қарши курашиш миллий кенгашининг навбатдаги мажлисида айтиб ўтди, деб хабар бермоқда «Дарё» мухбири.
Маълум қилинишича, Давлат харидлари портали ёрдамида 2021 йил давомида бюджет ва корпоратив харидлар бўйича аукцион, электрон дўкон орқали 147 триллион 388 миллиард сўмлик 1,456 миллиондан ортиқ битим амалга оширилиб, 5 триллион 786 миллиард сўм маблағ иқтисод қилинган.
Бундан ташқари, қонун бузилиши ҳолатлари юзасидан 272 та жиноят иши очилиб, 508 нафар шахс жавобгарликка тортилган. Аниқланган қонун бузилиши ҳолатлари юзасидан қўзғатилган жиноят ишлари натижасида давлат манфаатларига 121,2 миллиард сўмлик зарар етказилган.
«Давлат харидлари соҳасини коррупциясиз соҳага айлантириш бўйича 2020 йилда йўл харитаси қабул қилиниб, унда белгиланган вазифаларнинг 30 фоизи бажарилмагани аниқланди. Қолаверса, соҳага оид қонунчилик ҳужжатлари коррупцияга қарши экспертизадан ўтказилганда 16 та ҳужжатнинг 12 тасида (75 фоизи) 46 та коррупциявий омил мавжудлиги маълум бўлди», — дейди Танзила Норбоева.
Эслатиб ўтамиз, Ўзбекистонда давлат харидлари шаффофлигини таъминлашга оид президент қарори қабул қилинган эди. Қарор билан давлат харидлари очиқ ва шаффоф амалга оширилишини таъминлаш бўйича республика комиссияси тўғрисидаги низом тасдиқланган, шу билан бирга, давлат харидларини амалга ошириш жараёнлари алоҳида тартибда назорат қилинадиган айрим корпоратив ва бюджет буюртмачилари рўйхати ҳам тузилганди.
Изоҳ (0)