Трамп АҚШдаги «носоғлом ва радикал» сиёсатчиларни мамлакат учун энг катта хавф деб атади

АҚШ учун энг катта хавф билиб-билмай «мамлакатни йўқ қилишга» уринаётган радикал америкалик сиёсатчилардан келиб чиқади, деди собиқ президент Дональд Трамп Мичиган штатидаги тарафдорлари олдида қилган чиқишида.

«Хитой, Россия, Эрон ва бошқалар ҳақида эшитган ва кўрганларимизнинг барчасига қарамай, бизга энг катта хавф ташқаридан эмас, энг катта хавф носоғлом ва радикал сиёсатчилардан келмоқда», — деди Трамп. «Бу Россия ва Хитой таҳдидидан каттароқ».

Унинг фикрича, Қўшма Штатлар ҳозир «стагфляция» – инфляция ва рецессия ёқасида бормоқда, амалдаги президент Жо Байден маъмурияти эса Трамп президентлиги даврида эришган барча нарсаларни йўққа чиқариши мумкин. «Иш ҳақи пасаймоқда, улар сиз тўлайдиган солиқларни оширмоқчи», — деди у.

Ўз нутқи давомида Трамп, шунингдек, америкаликлар «Жо Байденнинг жисмоний ва руҳий таназзулига қарши ҳеч нарса қила олмаслигини», аммо улар «АҚШнинг таназзулини» тўхтатиш учун шу йилнинг кузида республикачиларга овоз бериши мумкинлигини айтди. «Мен ўзимизни яна қачон шунчалик паст даражада ҳис қилганимизни эслолмайман. Бизнинг президент нималар юз бераётганидан бехабар», — деди Трамп.

У кузда бўлиб ўтадиган сайловда республикачилар ғалаба қозонса, Байденга қарши тергов бошланишидан огоҳлантирди.

АҚШ Конгрессининг Вакиллар палатаси ва Сенати учун оралиқ сайловлар 2022 йил 8 ноябрга белгиланган.

Аввалроқ Трамп Жоржия штатидаги тарафдорлари билан учрашувда Байденни Америка орзусини «ўлдиришда» айблаганди. Собиқ давлат раҳбарининг сўзларига кўра, «Америка тарихидаги энг ёмон беш нафар президент бирлашганда ҳам Жо Байден атиги 15 ой ичида етказган зарарни келтирмаган бўларди». Шу билан бирга, Трамп тарафдорларини «умидни йўқотмасликка» чақирди ҳамда «тўғри раҳбарият билан Америка ҳар қачонгидан ҳам катта, кучли ва қудратли бўлади», деб ваъда берди. У 2024 йилги президентлик сайловларида ўз номзодини қўйиш нияти бор ёки йўқлигига аниқлик киритмаган.