Tramp AQSHdagi “nosog‘lom va radikal” siyosatchilarni mamlakat uchun eng katta xavf deb atadi

AQSH uchun eng katta xavf bilib-bilmay “mamlakatni yo‘q qilishga” urinayotgan radikal amerikalik siyosatchilardan kelib chiqadi, dedi sobiq prezident Donald Tramp Michigan shtatidagi tarafdorlari oldida qilgan chiqishida.

“Xitoy, Rossiya, Eron va boshqalar haqida eshitgan va ko‘rganlarimizning barchasiga qaramay, bizga eng katta xavf tashqaridan emas, eng katta xavf nosog‘lom va radikal siyosatchilardan kelmoqda”, — dedi Tramp. “Bu Rossiya va Xitoy tahdididan kattaroq”.

Uning fikricha, Qo‘shma Shtatlar hozir “stagflyatsiya” – inflyatsiya va retsessiya yoqasida bormoqda, amaldagi prezident Jo Bayden ma’muriyati esa Tramp prezidentligi davrida erishgan barcha narsalarni yo‘qqa chiqarishi mumkin. “Ish haqi pasaymoqda, ular siz to‘laydigan soliqlarni oshirmoqchi”, — dedi u.

O‘z nutqi davomida Tramp, shuningdek, amerikaliklar “Jo Baydenning jismoniy va ruhiy tanazzuliga qarshi hech narsa qila olmasligini”, ammo ular “AQShning tanazzulini” to‘xtatish uchun shu yilning kuzida respublikachilarga ovoz berishi mumkinligini aytdi. “Men o‘zimizni yana qachon shunchalik past darajada his qilganimizni eslolmayman. Bizning prezident nimalar yuz berayotganidan bexabar”, — dedi Tramp.

U kuzda bo‘lib o‘tadigan saylovda respublikachilar g‘alaba qozonsa, Baydenga qarshi tergov boshlanishidan ogohlantirdi.

AQSH Kongressining Vakillar palatasi va Senati uchun oraliq saylovlar 2022-yil 8-noyabrga belgilangan.

Avvalroq Tramp Jorjiya shtatidagi tarafdorlari bilan uchrashuvda Baydenni Amerika orzusini “o‘ldirishda” ayblagandi. Sobiq davlat rahbarining so‘zlariga ko‘ra, “Amerika tarixidagi eng yomon besh nafar prezident birlashganda ham Jo Bayden atigi 15 oy ichida yetkazgan zararni keltirmagan bo‘lardi”. Shu bilan birga, Tramp tarafdorlarini “umidni yo‘qotmaslikka” chaqirdi hamda “to‘g‘ri rahbariyat bilan Amerika har qachongidan ham katta, kuchli va qudratli bo‘ladi”, deb va’da berdi. U 2024-yilgi prezidentlik saylovlarida o‘z nomzodini qo‘yish niyati bor yoki yo‘qligiga aniqlik kiritmagan.