Ҳукумат қарори билан Аваз Мансуров Ўзбекистон давлат консерваторияси ҳузуридаги Ботир Зокиров номидаги Миллий эстрада санъати институтининг ректори этиб тайинланди. Бу ҳақда Telegram’даги «Ҳуқуқий ахборот» канали хабар қилди.
Маълумот учун, мазкур институт президент қарори билан 2021 йил 16 октябрда ташкил этилган. Институтда таълим фаолияти 2021/2022-ўқув йилидан бошланиб, таълим давлат гранти ҳамда тўлов-контракт асосида амалга оширилади.
2022/2023-ўқув йилидан бошлаб, бакалавриатда 2 та янги таълим йўналиши (бастакорлик санъати, санъатшунослик: мусиқашунослик) ва магистратурада 2 та янги мутахассислик (овоз режиссёрлиги: мусиқий овоз режиссёрлиги, мусиқа санъати) очилади.
Институтнинг асосий вазифалари этиб:
- юқори малакали мутахассислар ва илмий-педагог кадрларни тайёрлаш;
- миллий эстрада йўналишида замонавий ижро намуналарининг «Олтин фонди»ини яратиш ҳамда уларни нотага кўчириш ва амалиётга кенг жорий этиш;
- миллий эстрада йўналиши бўйича фундаментал, амалий ва ижодий изланиш ҳамда тадқиқотлар олиб бориш белгиланди.
Изоҳ (0)