Тошкент вилоятида 19 ёшли йигитнинг трансформатор токи уриши оқибатида вафот этишига сабабчи бўлган масъул шахсга беш йил муддатга озодликдан чеклаш жазоси тайинланди. Бу ҳақда Бош прокуратура матбуот хизмати раҳбари Ҳаёт Шамсутдинов «Дарё»га хабар берди.
Тошкент вилоятининг Тошкент туманида 2021 йилнинг май ойида 19 ёшли йигит трансформатор токи уриши оқибатида вафот этгани тўғрисида хабар берилганди. Ҳолат бўйича Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
Жиноят иши ҳужжатларига кўра, 1984 йилда Тошкент туманида туғилган С.С. Тошкент тумани «Электр таъминоти» корхонаси «Келес» устачилик бўлими катта устаси лавозимида ишлаб келиб, эгаллаб турган лавозимига кўра мансабдор шахс бўла туриб, «Чувалачи» маҳалла раиси ва фуқаролари томонидан Тошкент тумани, «Чувалачи» ҳудуди, Гуляшнар кўчасида жойлашган трансформаторга темир панжара уланганлиги ва ундан ток чиқаётганлиги тўғрисида бир неча маротаба оғзаки хабар берилган бўлса-да, ушбу оғзаки хабарларни текширмасдан назоратсиз қолдирган.
С.С. ўзига юклатилган вазифаларга лоқайдлик билан қараб, уларни лозим даражада бажармаганлиги оқибатида 2021 йил 6 май куни 2002 йилда туғилган Х.Т. трансформаторга уланган темир панжарани ушлаган вақтида темир панжарадан чиққан ток уриб, ҳодиса жойида вафот этган.
«Ўзэнергоинспекция» хулосасига кўра, «Келес» устачилик бўлими устаси С.С. томонидан белгиланган қоида талабларини бажаришда масъулиятсизликка йўл қўйганлиги аниқланган.
Ҳолат Жиноят ишлари бўйича Тошкент тумани судида 2021 йилнинг август ойида кўриб чиқилиб, айбланувчи С.С. Жиноят кодексининг 257-моддаси 2-қисми «а» банди (меҳнатни муҳофаза қилиш қоидаларини бузиш одам ўлишига сабаб бўлса) билан айбли деб топилган. Ҳукмга кўра, унга нисбатан беш йил муддатда озодликни чеклаш жазоси тайинланган. Шунингдек, икки йил меҳнатни муҳофаза қилиш фаолияти билан боғлиқ лавозимларда ишлаш ҳуқуқидан маҳрум қилинган.
Бундан аввал Тошкентда поезд устида селфи қилмоқчи бўлган 18 ёшли йигитни 27 минг волтли ток ургани ҳамда Тошкентда 8 ёшли қизалоқ электр токи уриши оқибатида вафот этгани ҳақида хабар берилганди.
Изоҳ (0)