31 март куни Ўзбекистон транспорт вазири Илҳом Маҳкамов Хитойнинг Ўзбекистондаги элчиси Сзян Ян хоним билан учрашди. Бу ҳақда Транспорт вазирлиги матбуот хизмати хабар берди.
Учрашувда томонлар транспорт соҳасини ривожлантириш борасидаги ўзаро ҳамкорликнинг бугунги ҳолати ва уни ривожлантириш истиқболларини муҳокама қилган.
Хусусан, Хитой—Қирғизистон—Ўзбекистон темир йўли қурилиши лойиҳасини амалга ошириш, шунингдек, биргаликдаги саъй-ҳаракатлар орқали ушбу йўналиш бўйлаб мултимодал транспорт коридорини ривожлантиришни давом эттириш муҳимлиги қайд этилган.
Бундан ташқари, томонлар эпидемиологик вазиятни ҳисобга олган ҳолда мамлакатлар ўртасида авиақатновларни қайта тиклаш масаласи юзасидан атрофлича фикр алмашган.
2021 йилнинг мартида Ўзбекистон Транспорт вазирлиги матбуот хизмати Хитойни Марказий Осиё мамлакатлари билан боғлайдиган темир йўл линияси лойиҳаси деярли 20 йилдан бери муҳокама қилинаётганини маълум қилганди. Томонлар баланд тоғлар, бориши қийин бўлган ҳудудлар орқали ўтадиган ушбу темир йўл эни, унинг маршрутлари бўйича ягона тўхтамга кела олмаётган эди.
Дастлабки ҳисоб-китобларга кўра, Хитой—Қирғизистон—Ўзбекистон темир йўлининг қурилиши Шарқий Осиёдан яқин Шарқ ва Жанубий Европага борадиган йўлни 900 километрга қисқартиради ва вақт 7-8 кунга камаяди. Йўл қурилиши Марказий Осиё мамлакатларининг транспорт инфратузилмасини ривожлантиришни таъминлайди ва уларга Форс кўрфази ва Тинч океанининг портларига қулай кириш имконини беради.
Изоҳ (0)