Бош прокуратура иш вақтида вафот этган 33 ёшли ходими учун 951 миллион сўм нафақа пули тўлаши тўғрисида хабар берилганди. Идора суднинг мазкур қарори ҳали қонуний кучга кирмаганини маълум қилди.
Биринчидан, прокуратура органлари тизимидаги ҳар бир ходим ва унинг оила аъзоларининг муносиб ижтимоий ҳимоя қилинишидан биринчи навбатда Бош прокуратуранинг ўзи манфаатдордир.Эслатиб ўтамиз, Ўзбекистон Бош прокуратураси жамоатчилик билан алоқалар ва ҳуқуқий ахборот бўлими прокурори лавозимида ишлаб келган Самир Раҳмонов 2021 йил 26 апрель куни 33 ёшида вафот этганди. Олий Мажлис Қонунчилик палатаси депутати Расул Кушербаев марҳумнинг отаси депутатга мурожаат қилиб, ўғли хизмат вазифасини бажараётган вақтда иш жойида вафот этгани, тўрт нафар вояга етмаган фарзандлари боқувчисиз қолса-да, унинг оиласига қонунга асосан кафолатланган нафақа пуллари тўлаб берилмаётганини билдирганини маълум қилган эди.Иккинчидан, ҳар қандай ижтимоий ҳимоя, хусусан, нафақа пулларининг тўлови қонунга сўзсиз риоя қилинган ҳолда амалга оширилиши шарт. Айниқса, бюджет интизомига риоя этилишини назорат қилишга масъул бўлган, айнан бюджетдан молиялаштириладиган прокуратура органларида бу тамойил устувор аҳамиятга эга. Бинобарин, марҳум ходим Самир Раҳмоновнинг вафоти муносабати билан унинг яқинларига тегишли тўловлар қонунда белгиланган энг юқори миқдорда тўлаб берилган.
Учинчидан, ҳали қонуний кучга кирмаган фуқаролик ишлари бўйича Миробод туманлараро судининг Н.Раҳмонова даъволарини қисман қаноатлантириш тўғрисидаги ҳал қилув қарорининг асослилиги Бош прокуратура томонидан атрофлича ўрганилади ва тегишли муносабат билдирилади.
Зотан, амалиётда ҳатто қотилликда ва бошқа оғир жиноятларда айбланган фуқароларнинг қуйи инстанция судлари томонидан асоссиз оқлангани ёки, аксинча, айбсизлар айбдор деб топилгани, прокуратуранинг саъй-ҳаракатлари билан эса адолат қарор топганига оид кўплаб маълумотлар жамоатчиликка яхши маълум.
Шу боис, судлар томонидан ҳали қонуний кучга кирмаган қарорлар юзасидан шошма-шошарлик билан жамоатчиликка ахборот беришнинг мақсадга мувофиқ эмаслигини яна бир карра таъкидлаймиз.
Бош прокуратура матбуот хизмати
Изоҳ (0)