«Сирдарё вилоятида қуввати 1 600 МВт бўлган буғ-газ иссиқлик электр станциясини қуриш» инвестиция лойиҳаси доирасида «Ўзбекистон миллий электр тармоқлари» АЖ ва EDF (Франция), Nebras Power (Қатар) ва Sojitz (Япония) компаниялари консорсиуми ўртасида электр энергиясини сотиб олиш бўйича битим имзоланди. Бу ҳақда Энергетика вазирлиги матбуот хизмати хабар берди.
Битим Тошкент халқаро инвестиция форуми доирасида Консорсиум вице-президенти Беатрис Буффон ва «Ўзбекистон миллий электр тармоқлари» бошқарув раиси Дадажон Исақулов томонидан имзоланган.
Лойиҳа доирасида Сирдарё вилояти Ширин шаҳрида 55 гектар майдонда замонавий H-class’даги қўшма циклда ишлайдиган газ ва буғ турбинали иссиқлик электр станцияси қурилиши режалаштирилган бўлиб, 2026 йилнинг январь ойида ишга туширилиши кутилмоқда.
Лойиҳанинг йиллик электр энергия ишлаб чиқариш қуввати 12 миллиард киловатт/соатни ташкил этади. Станциянинг фойдали иш коэффициенти 60 фоиздан юқори бўлади ва бунинг натижасида йилига 1,1 миллиард куб метр табиий газ тежалишига эришилади.
Аҳамиятлиси, станция қурилиши давомида 2,5 минг нафар, ишга тушгач эса 120 нафар янги иш ўрни яратилади.
«Марказий Осиё ва МДҲ давлатларида очиқ тендер савдолари орқали амалга оширилаётган энг йирик инвестиция лойиҳаларидан бири ҳисобланади», — дейилади хабарда.
Эслатиб ўтамиз, Халқаро молия корпорациясининг техник кўмагида ўтказилган очиқ тендерда 2021 йилнинг 19 ноябрь куни EDF—Небрас—Sojitz компаниялар консорсиуми ғолиб чиққан эди.
Мавзуга доир:
Изоҳ (0)