21—27 март кунлари бутун дунё бўйлаб 10 миллиондан ортиқ одамда коронавирус аниқланди, 45 мингдан ортиқ бемор вафот этди, деб хабар беради Жаҳон соғлиқни сақлаш ташкилоти.
Ташкилот маълумотларига кўра, касалланиш аввалги ҳафтага нисбатан 14 фоизга камайган, бироқ COVID-19 асоратлари оқибатида вафот этиш кўрсаткичи 43 фоизга ўсган.
ЖССТ ҳисоботида келтирилишича, бутун дунёда ҳафта давомида коронавирусга чалиниш ҳолатлари камайиб бораётгани кузатилмоқда. Шунингдек, тўртта минтақада ўлим ҳолатлари қисқаргани ҳам қайд этилган. 27 март ҳолатига кўра, бутун дунёда 479 миллиондан ортиқ одам коронавирусга чалинган ва 6 миллиондан ортиқ бемор вафот этган.
«2022 йилнинг январидан март бошига қадар COVID-19 билан янги касалланиш ҳолатларининг барқарор тенденцияси кузатилди, шундан сўнг, кетма-кет икки ҳафта давомида коронавирус билан касалланиш ҳолатлари ўсди», — дейилади хабарда.
Ўтган ҳафтада ЖССТ ковид билан касалланиш ҳолатлари кўплаб мамлакатлар кескин ва тезкорлик билан чекловларни бекор қилгани сабаб ортиб кетганини маълум қилганди. ЖССТ маълумотлари бўйича касалланиш ҳолатларининг ўсиши Европадаги 53 та давлатнинг 18 тасида қайд этилган.
Аввалроқ Хитойнинг Шанхай шаҳрида коронавирусининг авж олиши фонида, 28 март, душанба кунидан сўнгги икки йилдаги энг йирик локдаун жорий қилингани тўғрисида хабар берилганди.
Изоҳ (0)