Умуртқа поғонаси организмнинг энг муҳим органларидан бири бўлиб, унинг саломатлиги нафақат бел, балки кўплаб ички органларнинг ҳолатига бевосита таъсир қилади. Умуртқа поғонаси турли қисмларининг шикастланиши ёки эгрилик қон айланишининг бузилишига олиб келади ва натижада юрак хасталиги, мия фаолиятида бузилиш, овқат ҳазм қилиш ва бошқа касалликларнинг ривожланишига олиб келади.
Сиз ҳам умуртқа поғонасини кундан кунга сезилмайдиган тарзда зарарлайдиган одатлар бор-йўқлигини текшириб кўринг ва дарҳол улардан халос бўлинг.
Чекиш
Чекиш нафақат юрак-қон томир тизимига, балки умуртқа поғонасига ҳам зарар етказади ва умуртқа дискларнинг эрта дегенерациясига олиб келиши мумкин. Ҳақиқат шундаки, бу одат дисклардаги қон айланишига тўсқинлик қилади, бу уларнинг сувсизланишига ва озуқа моддаларининг етишмаслигига, кейинчалик эса йўқ бўлишига олиб келади. Инсон қанча кўп чекса, умуртқа поғонаси шунчалик кўп зарарланади.
Сут маҳсулотларини рад этиш
Кальций суяк саломатлиги учун, айниқса, 45-50 ёшдан кейин муҳим аҳамиятга эга. Сут маҳсулотлари ушбу фойдали элементнинг энг оддий ва арзон манбаи бўлиб қолмоқда. Уларни истеъмол қилмаслик орқали суяк мўртлашади ва остеопороз ривожланиш хавфини оширамиз. Аммо тиббий сабабларга кўра, лактозасиз парҳезда рационга яшил баргли сабзавотлар, балиқ, ёнғоқлар ва бошқа кальцийга бой маҳсулотларни киритиш тавсия этилади. 50 ёшга қадар кунига камида 1000 мг кальций, 50 дан кейин эса 1200 мг ёки ундан кўпроқ миқдорда кальций керак бўлади.
Эгилиб юриш одати
Столга тўғри ўтиришингиз ва ҳар қандай вазиятда қоматни тик тутиш керак. Инсон улғайгани сари қаддини тик тутиб юриши қийинлашади, лекин кекса ёшда тўғри умуртқа поғонаси кўпроқ муҳимдир, чунки ички органларга юк сезиларли даражада ошади. 30 ёшдан кейин мунтазам равишда ёга ва умуртқа поғонасини тўғрилашга қаратилган бошқа амалиётлар билан шуғулланиш фойдали.
Оёқларни чалкаштириб ўтириш
Бу одат ҳам аввалгисига боғлиқ. Оёқлар чалкаштирилганда, қомат доимий равишда эгилади. Бу ҳолат лумбосакрал умуртқа поғонасидаги юкни оширади ва қўшимча равишда тос бўшлиғида ва оёқ томирларида қон таъминотини бузади ва вақт ўтмай тромбоз, артроз ва варикоз томирларига олиб келади.
Смартфонга қарамлик
Смартфон билан жуда тез-тез ва узоқ вақт ишлаш умуртқа поғонаси ҳолатига ҳам ёмон таъсир қилади: телефон елкага қўйиб гаплашилганда, умуртқа кўпроқ зўриқади. Вақт ўтиши билан, бу ҳатто дискларнинг силжишига ва жиддий эгриликка олиб келиши мумкин.
Ўтириб ишлаш
Иш узоқ вақт қимирламасдан кўп вақт сарфлашни талаб қилса, албатта, умуртқа поғонасига ғамхўрлик қилишингиз керак. Биринчидан, ҳар соатда кичик танаффуслар қилиш лозим. Иккинчидан, умуртқа поғонасининг бўйин ва елка қисмларида оғриқнинг олдини олиш учун кунига бир неча марта машқ бажаришга арзийди. Бу нафақат умуртқа поғонасини мустаҳкамлашга ёрдам беради, балки ортиқча вазн билан курашишга имкон беради.
Нотўғри тўшак
Умуртқанинг соғлиғи учун ўрта қаттиқликдаги тўшакда ухлаш тавсия этилади, бу уйқу пайтида умуртқа поғонасини ва бошнинг физиологик ҳолатини оптимал даражада бир хилда қўллаб-қувватлайди. Шу билан бирга, эгрилик ва қон айланишининг бузилишидан қочиш мумкин.
Кўп қаҳва ичиш
Қаҳва ажойиб ичимлик бўлиб, соғлиқ учун жуда кўп фойда келтириши мумкин, аммо шуни ёдда тутиш керакки, кофеин том маънода суякларимиздан кальцийни ювиб, синиш хавфини оширади. Тез-тез қаҳва ичадиганлар рационда кальцийни ўз ичига олган етарли миқдорда озиқ-овқат мавжудлигига ишонч ҳосил қилиши лозим.
Оғир сумка
Катта ҳажмли, оғир сумка олиб юрадиганларнинг умуртқа поғонаси катта хавф остида. Сумка қанчалик катта бўлса, уни турли хил керакли нарсалар билан тўлдириш васвасаси шунчалик юқори бўлади, натижада умуртқа поғонасидаги юк шунчалик юқори бўлади. Уни кичикроқ модель билан алмаштириш организм учун яхши.
Баланд пошнали туфлилар
Баланд ва ингичка пошналар умуртқа поғонаси учун биринчи рақамли душман. Агар баланд пошнали туфлилардан бутунлай воз кечишга тайёр бўлмасангиз, ҳеч бўлмаганда уларни кийиш частотасини камайтириш мумкин. Қолган вақтда эса қулай ёки жуда кичик пошнали пойабзал ва этикларга устунлик беринг.
Изоҳ (0)