Иқтисодий тараққиёт ва камбағалликни қисқартириш бош бошқармасининг Каттақўрғон шаҳар бўлими бош мутахассиси пора билан қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, ДХХ Самарқанд вилояти бошқармаси, вилоят ИИБ ҳамда вилоят Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида тезкор тадбир ўтказилган.
Ўтказилган тадбирда Самарқанд вилояти Иқтисодий тараққиёт ва камбағалликни қисқартириш бош бошқармасининг Каттақўрғон шаҳар бўлими бош мутахассиси 30 ёшли Ж.Р. маҳаллий фуқарога Каттақўрғон шаҳрида қурилаётган янги 12 қаватли уйлардан 3 хонали хонадонни давлат томонидан ажратиладиган субсидия ҳисобида сотиб олишга ёрдам беришини айтгани аниқланган. У фуқарони базавий рўйхатга қўшиш ва субсидия ажратиб бериш эвазига 1,2 минг доллар миқдоридаги пулларни олаётган вақтида ушланган.
Шунингдек, Ж.Р.га нисбатан ўтказилган шахсий тинтув вақтида унинг ёнидан тахминан 5-10 грамм миқдоридаги марихуанна гиёҳвандлик воситаси, 300 доллар миқдорида пул маблағлари ҳамда гиёҳвандлик воситасини истеъмол қилиш учун мўлжалланган мослама топилган.
Ушбу фуқарога нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Бундан олдин Наманганда субсидия ажратиш учун тадбиркордан 118 миллион сўм олган маҳалла раиси ушланган эди.
Изоҳ (0)