Iqtisodiy taraqqiyot va kambag‘allikni qisqartirish bosh boshqarmasining Kattaqo‘rg‘on shahar bo‘limi bosh mutaxassisi pora bilan qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, DXX Samarqand viloyati boshqarmasi, viloyat IIB hamda viloyat Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida tezkor tadbir o‘tkazilgan.
O‘tkazilgan tadbirda Samarqand viloyati Iqtisodiy taraqqiyot va kambag‘allikni qisqartirish bosh boshqarmasining Kattaqo‘rg‘on shahar bo‘limi bosh mutaxassisi 30 yoshli J.R. mahalliy fuqaroga Kattaqo‘rg‘on shahrida qurilayotgan yangi 12 qavatli uylardan 3 xonali xonadonni davlat tomonidan ajratiladigan subsidiya hisobida sotib olishga yordam berishini aytgani aniqlangan. U fuqaroni bazaviy ro‘yxatga qo‘shish va subsidiya ajratib berish evaziga 1,2 ming dollar miqdoridagi pullarni olayotgan vaqtida ushlangan.
Shuningdek, J.R.ga nisbatan o‘tkazilgan shaxsiy tintuv vaqtida uning yonidan taxminan 5-10 gramm miqdoridagi marixuanna giyohvandlik vositasi, 300 dollar miqdorida pul mablag‘lari hamda giyohvandlik vositasini iste’mol qilish uchun mo‘ljallangan moslama topilgan.
Ushbu fuqaroga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Bundan oldin Namanganda subsidiya ajratish uchun tadbirkordan 118 million so‘m olgan mahalla raisi ushlangan edi.
Izoh (0)