Ўзбекистонда хизмат кўрсатган артист Тоир Қўзиевнинг мусиқий асаридан муаллифнинг розилигисиз фойдаланган Тошкентдаги машҳур ресторан жаримага тортилди. Бу ҳақда «Дарё»га Ўзбекистон муаллифлик ва турдош ҳуқуқларни ҳимоя қилиш жамияти матбуот хизмати хабар бермоқда.
2022 йил 4 март куни бўлиб ўтган фуқаролик ишлари бўйича Миробод туманлараро судида Ўзбекистон Республикаси муаллифлик ва турдош ҳуқуқларни ҳимоя қилиш жамияти «УзАвтор» томонидан Ўзбекистон Республикасида хизмат кўрсатган артист Қўзиев Тоир Асқарович манфаатлари юзасидан киритилган даъво аризаси кўриб чиқилди.
Ушбу киритилган даъво аризасининг ўзига хос жиҳати шундан иборатки, «УзАвтор» томонидан мамлакатимизда илк маротаба муаллифнинг рухсатисиз унинг асаридан фойдаланганлик учун ресторан судга берилди.
Яъни муаллиф Тоир Қўзиевнинг «Cumite» номли мусиқий асаридан унинг розилигини олмасдан фойдаланган Тошкентдаги машҳур ресторанлардан бирига нисбатан суднинг ҳал қилув қарори ўқиб эшиттирилди.
Ҳал қилув қарорида жавобгарга (номини ошкор қилмаслигимизни илтимос қилган) нисбатан Ўзбекистон Республикасининг «Муаллифлик ҳуқуқи ва турдош ҳуқуқлар тўғрисида»ги қонунига биноан муаллиф Қўзиев Тоир Асқарович фойдасига тегишли (ёки 5 миллион сўм) товон пулини (бой берилган фойда) тўлаб бериш мажбурияти юклатилди.
Изоҳ (0)