Фермер хўжалиги ва Ёшлар меҳнат гузари учун ажратилган ер майдонларини сотмоқчи бўлган фирибгарлар ушланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департамент ҳамда Давлат хавфсизлик хизматининг Жиззах вилояти бошқармалари томонидан тезкор тадбир ўтказилган. Унда «Ҳ.С.» фермер хўжалиги раҳбари О.Н. хўжаликнинг 20 гектар сувли ер майдонини фуқаро М.га 230 миллион сўмга сотишга келишгани аниқланган. У келишилган пулдан 100 миллион сўмни олган вақтида ашёвий далиллар билан ушланган.
Бундан ташқари, департаментнинг Наманган вилояти Косонсой туман бўлими томонидан тезкор тадбир ўтказилган. Унда «З.М» фермер хўжалиги раҳбари М.Р. хўжаликнинг 1 гектар ғалла экин ер майдонини 8 минг доллар эвазига боғдорчилик йўналишида фуқаро А.нинг номига ўтказиб беришни ваъда қилгани аниқланган. У хизмати эвазига 6 минг 100 доллар ва 20 миллион сўмни олган вақтида ашёвий далиллар билан қўлга олинган.
Шунингдек, департамент ҳамда ДХХнинг Сирдарё вилояти бошқармалари томонидан тезкор тадбир ўтказилган. Унда муқаддам фирибгарлик жинояти учун судланган фуқаро Ғ.К. Мирзаобод тумани ҳудудидан Ёшлар меҳнат гузари биносини қуриш учун ажратилган 40 сотих ер майдонининг 6 сотихини фуқаро С.га 6 минг 600 долларга сотишга келишгани аниқланган. У келишилган пулдан 4 минг долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг тегишли моддалари билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)