ИИВ Йўл ҳаракати хавфсизлиги хизмати айрим ҳудудларда, шунингдек, Тошкент шаҳрида шамол тезлиги кучайиб бораётгани сабаб огоҳлантириш билан чиқди.
«Барча ҳайдовчилардан йўлларда эҳтиёткор бўлишларини, транспорт воситаларини дарахт ёки кучли шамолга чидамсиз жойларда қолдирмасликларини сўраймиз», — дейилади хабарда.
«Ўзгидромет» 26 март куни Ўзбекистонга яна нам ва салқин ҳавонинг бир қисми кириб келишини маълум қилганди. Республиканинг шимолидан ташқари барча вилоятларда яна булутли ва ёмғирли об-ҳаво бўлиши кутилмоқда. Фарғона водийси вилоятларида куннинг иккинчи ярмида ёмғир ёғади. Кундуз куни ҳарорат 12-15 даража илиққача пасаяди. 26 мартда республиканинг айрим жойларида шамол тезлиги 18-23 метр/секундгача кучайиши кутилмоқда.
Эслатиб ўтамиз, 12 март куни Тошкент шаҳри Мирзо Улуғбек туманида автомобиллар устига дарахт қулаб тушган. Фавқулодда вазиятлар вазирлиги фуқаролардан кучли шамол ва ёғингарчилик вақтида автотранспорт воситаларини дарахтлар остида қолдирмасликни сўраган. Шунингдек, Қамчиқ довонидаги икки туннел орасида жойлашган ҳудудда бир кеча-кундузда жуда кўп ёғингарчиликдан ҳосил бўлган сув оқими автомобиль йўлининг остки қисмини ўпириб туширган. 18 март куни Тошкентда дарахт 6 та машина устига қулаб тушганди.
Изоҳ (0)