Бугун,

  • USD 11095.31
  • RUB 173.84
  • EUR 10772.44

Жон Траволта дунёдаги энг машҳур актёрлардан бири. Унинг фильмографиясида бир неча ўнлаб асарлар, жумладан «Жиноий асар», «Бриолин» ва «Юзсиз» каби машҳур фильмлар мавжуд. Бу йил актёр ўзининг 68 ёшини нишонлади. Унинг ижодий йўли қандай кечганини, қандай машаққатли синовлардан ўтганини ёдга оламиз.

Ҳамма каби эмас

Жон Траволта

Жон Траволта
Фото: Legion-Media

Жон Траволта келиб чиқиши италиялик бўлган футболчи Салвадор Траволта ва қўшиқчи Ҳелен Траволта оиласида дунёга келади. У олти нафар фарзанднинг энг кичиги эди.

Жон туғилганда онаси ўрта мактабда актёрлик ва инглиз тилидан дарс берарди. Бу эса Жоннинг келажакда касб танлашига катта таъсир кўрсатди. Унинг ака-опалари ҳам актёр бўлишди, лекин машҳурликда Жондан ўта олишмади.

Траволта актёрлик санъатига шунчалик иштиёқи баланд эдики, тенгдошлари уни ажратиб қўйишарди. Жон ўшандаёқ уларнинг жамиятига мос келмаслигини ҳис қилди. «Мен ҳам улар каби футбол, баскетбол ўйнардим, улар қилган ишни қилардим, лекин болалар кечқурунлари нима учун актёрлик студиясига боришимни тушунишмасди», — дейди актёр.

16 ёшида у мактабни ташлаб, шоу-бизнесда карьерасини давом эттиришга қарор қилди. Онаси унинг қарорини қўллаб-қувватлади.

Орзу ортидан

Жон Траволта ва Семуэл Л. Жексон «Жиноий асар» фильмида

Жон Траволта ва Семуэл Л. Жексон «Жиноий асар» фильмида
Фото: Legion-Media

Уйини тарк этган Траволта Нью-Йоркка кўчиб ўтди ва у ерда кам бюджетли реклама ва саҳналаштирилган шоуларда кичик ролларда суратга туша бошлади.

Аммо тез орада интилувчан Жон ўзининг барча актёрлик амбицияларини амалга ошириши мумкин бўлган ягона жой борлигини тушунди ва Голливудни забт этишни мақсад қилди.

Унинг биринчи кўзга кўринган роли 1976 йилда намойиш этилган «Керри» фильми бўлди. Стивен Кинг асарининг мазкур экранлаштирилган варианти барча даврларнинг энг муваффақиятли даҳшатли фильмларидан бири деган номга сазовор бўлган ва у бугунги кунгача шу номни сақлаб қолган.

Бу рол Траволтанинг кейинги тақдирини ҳал қилиб берди — уни пайқашди ва таклифлар ёғилиб кела бошлади.

Оливия Нютон-Жон ва Жон Траволта «Бриолин» фильмида

Оливия Нютон-Жон ва Жон Траволта «Бриолин» фильмида
Фото: Кинопоиск

«Шанба оқшоми иситмаси» фильмидаги роли унга «Оскар» мукофотини олиб келди. 24 ёшида Траволта нуфузли кино мукофотига номзод бўлган энг ёш актёрга айланди.

Унинг карьерасидаги яна бир муҳим воқеа «Бриолин» мусиқий фильмидаги бош рол уни суперюлдузга айлантирди. Фильмдаги қўшиқларни ўзи ижро этгани эса истеъдодининг яна бир қирраси эди.

1980 йилларда карьерасидаги пасайишдан сўнг, актёр 1994 йилда Квентин Тарантинонинг «Жиноий асар» фильмида суратга тушганидан сўнг яна томошабинлар эътиборида бўлди. Мазкур фильм катта муваффақиятга эришди ва Траволта яна бир «Оскар» номинациясига сазовор бўлди.

Ума Турман ва Жон Траволта «Жиноий асар» фильмида

Ума Турман ва Жон Траволта «Жиноий асар» фильмида
Фото: Legion-Media

Жон ўзининг аввалги машҳурлигини тиклаб олди. Бир йил ичида унинг сурати тўрт марта Rolling Stone журналининг муқовасида нашр этилди – ҳозиргача тарихда ҳеч бир актёр бундай ютуқ билан мақтана олмайди.

2000 йилларда ҳам у фильмларда фаол рол ўйнашда давом этди ва ҳозир ҳам фильмларда суратга тушиш билан банд.

Само чорламоқда

Жон Траволта

Жон Траволта
Фото: Legion-Media

Голливудда машҳур актёр бўлиш орзусидан ташқари, Траволта болалигидан яна бир нарсани орзу қилган — у самолёт бошқаришни ўрганмоқчи эди. Шу сабабли актёрлик фаолиятининг дастлабки йилларида у барча пулни учувчилик дарслари учун сарфлади. 22 ёшида Жон лицензия олди ва учувчи бўлди. Ҳатто актёрликни ташлаб, авиацияга кетишни хоҳлаган пайтлари ҳам бўлган.

Траволта ўзининг асосий севимли машғулоти учун ҳеч қачон пул аямаган — унинг шахсий коллекциясида бир нечта самолёти бор, уйида эса иккита махсус қурилган учиш-қўниш йўлаги мавжуд.

Муҳаббат ва фожиалар

Диана Хайленд ва Жон Траволта

Диана Хайленд ва Жон Траволта
Фото: Legion-Media

1976 йилда «Қопқоқ остида» фильмининг суратга олиш жараёнида актёр ҳамкасби Диана Хайландни севиб қолди. Диана Жондан 18 ёш катта бўлишига қарамай, бу севишганларга халақит бермади — бахтли жуфтлик келажак учун биргаликда режалар туза бошлади.

Афсуски, уларнинг муносабатлари ниҳоятда қайғули тарзда якунланди: Хайландга кўкрак бези саратони ташхиси қўйилгач, кўплаб даволаниш курсларидан ўтиб, яхши тиббий ёрдам олган бўлса-да, касаллик барибир уни енгди. Актриса 1977 йилда 41 ёшида вафот этди.

Бу фожиа Траволта учун қаттиқ зарба бўлди, актёр чуқур қайғуга ботди. Севгилисининг вафотидан кейин «Эмми» мукофотининг тақдирлаш маросимида у Дианани самимий сўзлар билан ёдга олганида, бутун зални йиғлаб юборди.

Бахтсизлик актёрни таъқиб қилишда давом этди: бир неча ой ўтгач, онаси Хелен ҳам кўкрак саратонидан вафот этди.

Жон Траволта ва Келли Престон

Жон Траволта ва Келли Престон
Фото: Legion-Media

Актёр булар тақдир унга тайёрлаб қўйган синовларнинг бошланиши эканини хаёлига ҳам келтирмаганди.

12 йиллик ёлғизликдан сўнг, ниҳоят Траволта актриса ва қўшиқчи Келли Престон билан учраша бошлади. 1989 йилда киносиновда танишиб қолган жуфтлик икки йилдан кейин турмуш қурди. «Орамизда тушуниб бўлмас муҳаббат бор эди», — деб эслайди актёр.

Бир йил ўтгач, эр-хотин Жетт исмли ўғил кўрди. 2000 йилда уларнинг қизи Элла туғилди.

Актёрнинг ўғлида эпилептик тутқаноқ такрорланиб турган. 2009 йилда даҳшатли фожиа юз берди: таътилни Багам оролларида ўтказишаётганда навбатдаги тутқаноғи тутиб қолган ўғли бошини ваннага уриб олди ва вафот этди. «Бу ҳаётимдаги энг даҳшатли воқеа эди. Ростини айтсам, энди яшай олмасам керак, деб ўйлагандим», — деб тан олади актёр интервьюсида.

Келли Престон ва Жон Траволта ўғли Бенжамин ва қизи Элла билан

Келли Престон ва Жон Траволта ўғли Бенжамин ва қизи Элла билан
Фото: Legion-Media

Ўғлининг ўлимидан сўнг, Жон ва Келли ёлғиз қолиш учун бир муддат ОАВларда кўринмай қолди. Улар яна омма эътиборига қайтганларида эса кутилмаган янгиликни эълон қилишди — улар фарзанд кутишаётган эди. Биринчи фарзанди вафотидан деярли икки йил ўтгач, уларнинг ўғли Бенжамин туғилди.

Энди ҳамма нарса ўз изига тушгандек эди: тақдир актёрни бутун умри аямади, энди мукофотлаш вақти келганди. Аммо 2018 йилда яна бир қайғули хабар маълум бўлди: Келлига кўкрак бези саратони ташхиси қўйилди. Икки йиллик тинимсиз  курашдан сўнг 2020 йилда Траволтанинг иккинчи хотини ҳам вафот этди.

Жон бу сафар ҳам тақдир зарбасига дош бера олади: у мухлислари учун меҳнатсевар, кучли ва муносиб одам бўлиб қолади.

Келли Престон ва Жон Траволта

Келли Престон ва Жон Траволта
Фото: Legion-Media

Изоҳ
Asosiy yangiliklar
Дунё
Рамзан Қодировни танқид қилган чеченистонлик блогер ўлдириб кетилди
Маҳаллий
Ўзбекистонда талабалар учун қишки таътил муддати белгиланди
Маҳаллий
Ўзбекистонда сўнгги суткада 153 кишида коронавирус аниқланди