Jon Travolta dunyodagi eng mashhur aktyorlardan biri. Uning filmografiyasida bir necha o‘nlab asarlar, jumladan “Jinoiy asar”, “Briolin” va “Yuzsiz” kabi mashhur filmlar mavjud. Bu yil aktyor o‘zining 68 yoshini nishonladi. Uning ijodiy yo‘li qanday kechganini, qanday mashaqqatli sinovlardan o‘tganini yodga olamiz.
Hamma kabi emas
Jon Travolta kelib chiqishi italiyalik bo‘lgan futbolchi Salvador Travolta va qo‘shiqchi Helen Travolta oilasida dunyoga keladi. U olti nafar farzandning eng kichigi edi.
Jon tug‘ilganda onasi o‘rta maktabda aktyorlik va ingliz tilidan dars berardi. Bu esa Jonning kelajakda kasb tanlashiga katta ta’sir ko‘rsatdi. Uning aka-opalari ham aktyor bo‘lishdi, lekin mashhurlikda Jondan o‘ta olishmadi.
Travolta aktyorlik san’atiga shunchalik ishtiyoqi baland ediki, tengdoshlari uni ajratib qo‘yishardi. Jon o‘shandayoq ularning jamiyatiga mos kelmasligini his qildi. “Men ham ular kabi futbol, basketbol o‘ynardim, ular qilgan ishni qilardim, lekin bolalar kechqurunlari nima uchun aktyorlik studiyasiga borishimni tushunishmasdi”, — deydi aktyor.
16 yoshida u maktabni tashlab, shou-biznesda karyerasini davom ettirishga qaror qildi. Onasi uning qarorini qo‘llab-quvvatladi.
Orzu ortidan
Uyini tark etgan Travolta Nyu-Yorkka ko‘chib o‘tdi va u yerda kam budjetli reklama va sahnalashtirilgan shoularda kichik rollarda suratga tusha boshladi.
Ammo tez orada intiluvchan Jon o‘zining barcha aktyorlik ambitsiyalarini amalga oshirishi mumkin bo‘lgan yagona joy borligini tushundi va Gollivudni zabt etishni maqsad qildi.
Uning birinchi ko‘zga ko‘ringan roli 1976-yilda namoyish etilgan “Kerri” filmi bo‘ldi. Stiven King asarining mazkur ekranlashtirilgan varianti barcha davrlarning eng muvaffaqiyatli dahshatli filmlaridan biri degan nomga sazovor bo‘lgan va u bugungi kungacha shu nomni saqlab qolgan.
Bu rol Travoltaning keyingi taqdirini hal qilib berdi — uni payqashdi va takliflar yog‘ilib kela boshladi.
“Shanba oqshomi isitmasi” filmidagi roli unga “Oskar” mukofotini olib keldi. 24 yoshida Travolta nufuzli kino mukofotiga nomzod bo‘lgan eng yosh aktyorga aylandi.
Uning karyerasidagi yana bir muhim voqea “Briolin” musiqiy filmidagi bosh rol uni superyulduzga aylantirdi. Filmdagi qo‘shiqlarni o‘zi ijro etgani esa iste’dodining yana bir qirrasi edi.
1980-yillarda karyerasidagi pasayishdan so‘ng, aktyor 1994-yilda Kventin Tarantinoning “Jinoiy asar” filmida suratga tushganidan so‘ng yana tomoshabinlar e’tiborida bo‘ldi. Mazkur film katta muvaffaqiyatga erishdi va Travolta yana bir “Oskar” nominatsiyasiga sazovor bo‘ldi.
Jon o‘zining avvalgi mashhurligini tiklab oldi. Bir yil ichida uning surati to‘rt marta Rolling Stone jurnalining muqovasida nashr etildi – hozirgacha tarixda hech bir aktyor bunday yutuq bilan maqtana olmaydi.
2000-yillarda ham u filmlarda faol rol o‘ynashda davom etdi va hozir ham filmlarda suratga tushish bilan band.
Samo chorlamoqda
Gollivudda mashhur aktyor bo‘lish orzusidan tashqari, Travolta bolaligidan yana bir narsani orzu qilgan — u samolyot boshqarishni o‘rganmoqchi edi. Shu sababli aktyorlik faoliyatining dastlabki yillarida u barcha pulni uchuvchilik darslari uchun sarfladi. 22 yoshida Jon litsenziya oldi va uchuvchi bo‘ldi. Hatto aktyorlikni tashlab, aviatsiyaga ketishni xohlagan paytlari ham bo‘lgan.
Travolta o‘zining asosiy sevimli mashg‘uloti uchun hech qachon pul ayamagan — uning shaxsiy kolleksiyasida bir nechta samolyoti bor, uyida esa ikkita maxsus qurilgan uchish-qo‘nish yo‘lagi mavjud.
Muhabbat va fojialar
1976-yilda “Qopqoq ostida” filmining suratga olish jarayonida aktyor hamkasbi Diana Xaylandni sevib qoldi. Diana Jondan 18 yosh katta bo‘lishiga qaramay, bu sevishganlarga xalaqit bermadi — baxtli juftlik kelajak uchun birgalikda rejalar tuza boshladi.
Afsuski, ularning munosabatlari nihoyatda qayg‘uli tarzda yakunlandi: Xaylandga ko‘krak bezi saratoni tashxisi qo‘yilgach, ko‘plab davolanish kurslaridan o‘tib, yaxshi tibbiy yordam olgan bo‘lsa-da, kasallik baribir uni yengdi. Aktrisa 1977-yilda 41 yoshida vafot etdi.
Bu fojia Travolta uchun qattiq zarba bo‘ldi, aktyor chuqur qayg‘uga botdi. Sevgilisining vafotidan keyin “Emmi” mukofotining taqdirlash marosimida u Dianani samimiy so‘zlar bilan yodga olganida, butun zalni yig‘lab yubordi.
Baxtsizlik aktyorni ta’qib qilishda davom etdi: bir necha oy o‘tgach, onasi Xelen ham ko‘krak saratonidan vafot etdi.
Aktyor bular taqdir unga tayyorlab qo‘ygan sinovlarning boshlanishi ekanini xayoliga ham keltirmagandi.
12 yillik yolg‘izlikdan so‘ng, nihoyat Travolta aktrisa va qo‘shiqchi Kelli Preston bilan uchrasha boshladi. 1989-yilda kinosinovda tanishib qolgan juftlik ikki yildan keyin turmush qurdi. “Oramizda tushunib bo‘lmas muhabbat bor edi”, — deb eslaydi aktyor.
Bir yil o‘tgach, er-xotin Jett ismli o‘g‘il ko‘rdi. 2000-yilda ularning qizi Ella tug‘ildi.
Aktyorning o‘g‘lida epileptik tutqanoq takrorlanib turgan. 2009-yilda dahshatli fojia yuz berdi: ta’tilni Bagam orollarida o‘tkazishayotganda navbatdagi tutqanog‘i tutib qolgan o‘g‘li boshini vannaga urib oldi va vafot etdi. “Bu hayotimdagi eng dahshatli voqea edi. Rostini aytsam, endi yashay olmasam kerak, deb o‘ylagandim”, — deb tan oladi aktyor intervyusida.
O‘g‘lining o‘limidan so‘ng, Jon va Kelli yolg‘iz qolish uchun bir muddat OAVlarda ko‘rinmay qoldi. Ular yana omma e’tiboriga qaytganlarida esa kutilmagan yangilikni e’lon qilishdi — ular farzand kutishayotgan edi. Birinchi farzandi vafotidan deyarli ikki yil o‘tgach, ularning o‘g‘li Benjamin tug‘ildi.
Endi hamma narsa o‘z iziga tushgandek edi: taqdir aktyorni butun umri ayamadi, endi mukofotlash vaqti kelgandi. Ammo 2018-yilda yana bir qayg‘uli xabar ma’lum bo‘ldi: Kelliga ko‘krak bezi saratoni tashxisi qo‘yildi. Ikki yillik tinimsiz kurashdan so‘ng 2020-yilda Travoltaning ikkinchi xotini ham vafot etdi.
Jon bu safar ham taqdir zarbasiga dosh bera oladi: u muxlislari uchun mehnatsevar, kuchli va munosib odam bo‘lib qoladi.
Mavzuga doir:
- Afsonaga aylangan liverpullik oddiy yigitlar: XX asrning eng mashhur rok guruhi — Bitlz tarixi
- Kameradan qo‘rqadi, 5 farzandning otasi: Gollivud yulduzi Xyu Grantning qarama-qarshiliklarga to‘la hayotiy hikoyasi
- Dunyoni o‘zgartirish uchun Garvard universitetini tashlab ketgan: Facebook asoschisi Mark Sukerbergning muvaffaqiyat tarixi
Izoh (0)