Наманганда аҳолига табиий газ етказиб беришда мавжуд уч босқичли тизимдан воз кечилмоқда. Бу ҳақда «Ҳудудгаз Наманган» газ таъминоти филиали директорининг биринчи ўринбосари Ўткирбек Мамадалиев маълум қилди, дея хабар беради «Дарё» мухбири Азизбек Абдувалиев.
Ушбу тизим табиий газ етказиб беришнинг паст, ўрта ва юқори босимли босқичларидан иборат эди. Энди паст босимли босқичдан воз кечилмоқда.
Бунинг учун филиал инженер-техник ходимларидан ташкил топган 13 та махсус ишчи гуруҳлари тузилди. Ушбу гуруҳлар томонидан бугунга қадар фойдаланишда бўлган жами 5737 та газ босимини созловчи (ГРП) қурилмадан 3516 таси демонтаж қилиниб, икки ва ундан ортиқ тортилган газ қувурлари тартибга келтирилмоқда.
«Амалга оширилган ишлар натижасида ҳозирда вилоятдаги 60 000 дан ортиқ ҳовли хонадонлари икки босқичли тизимга ўтказилиб, ҳозирда бир меъёрда табиий газ етказиб берилмоқда. Жорий йилнинг 1 ноябрь кунига қадар аҳолига тўлиқ янги тизим орқали табиий газ етказиб бериш йўлга қўйилади», — дейди Ўткирбек Мамадалиев.
Изоҳ (0)