Қашқадарё ҳокими Муроджон Азимов маҳаллий бюджет маблағларига шахсий пиарини йўлга қўйган ҳокимлар фаолиятини танқид қилди. Бу ҳақда «Дарё» мухбири хабар берди.
Муроджон Азимов бу ҳақда кеча, 23 март куни бўлиб ўтган аппарат йиғилишида гапирган.
«Вилоят ҳокими халқдан олинган солиқ тушумлари ҳокимларнинг шахсий пиари учун сарфланиши умуман нотўғри иш эканини айтди. Айнан Шаҳрисабз шаҳри ҳокимига дакки берди. Муроджон Азимов, шунингдек, Шаҳрисабз шаҳри ҳокимининг бошқа ҳокимларни ерга уриш эвазига мақтов олишини ёмон баҳолади», — дейди «Дарё» манбаси.
«Дарё» мухбири мазкур масала юзасидан Шаҳрисабз шаҳри ҳокими Акром Сулаймонов билан суҳбатлашди.
Акром Сулаймонов вилоят ҳокимининг аппарат йиғилишида айтган бу фикрлари унга қаратилмаганини, маҳаллий бюджет маблағлари эвазига ҳеч қандай шартномавий муносабатлар ўрнатмаганини билдирди.
«Нима учун бу ҳақда айнан мендан сўраяпсиз? Қайси ҳоким ҳақида гапирганини билмоқчи бўлсангиз, унда вилоят ҳокимининг ўзидан сўранг. Менинг бу ишларга умуман алоқам йўқ. Биз ҳеч ким билан шартнома қилмаганмиз ва умуман пиарга пул сарфламаганмиз. Қўшимча саволлар бўлса, ҳокимликнинг ахборот хизматига боғланиб, ахборот олишингиз мумкин», — деди Акром Сулаймонов.
Маълум бўлишича, Шаҳрисабз шаҳри ҳокими Акром Сулаймонов 2022 йил 7 март куни янги қарорга имзо чеккан. Ҳокимнинг маҳаллий бюджетнинг 2022 йил эркин қолдиқ маблағлари ҳамда 2022 йил захира маблағлари ҳисобидан тегишли харажатлар учун маблағ ажратиш тўғрисидаги қарорига кўра, 135 миллион сўм маблағ ажратилиб матбуот ва оммавий ахборот воситаларидан фойдаланиш харажати сифатида чиқим қилиниши белгиланган.
Халқ тўлаган солиқдан ажратилган 135 миллион сўм маблағ матбуот ва оммавий ахборот воситаларидан фойдаланишда қай тартибда сарфланишига аниқлик киритиш мақсадида шу маблағлар сарфланишини назорат қилувчи шаҳар ҳокимининг биринчи ўринбосари Акамурод Узоқов билан суҳбатлашдик.
«Бу маблағни қилинаётган барча ишларимизни оммавий ахборот воситаларида ёритиш учун сарфлаймиз», — деди «Дарё» мухбирининг бу ҳақдаги саволига жавоб берган Акамурод Узоқов.
Шаҳрисабз шаҳри ҳокими Акром Сулаймонов эса ўринбосари тан олган ҳолатни умуман инкор этди.
«Дарё» мухбирининг аниқлаштиришича, Шаҳрисабз шаҳри ҳокими 2021 йилда ҳам қилинган ишларини оммалаштириш мақсадида ОАВ вакиллари, хусусан блогерлар билан 128 миллион сўмлик шартнома имзолаб, маҳаллий бюджет маблағларидан ўзбошимча фойдаланган.
«Шу 128 миллион сўм нотўғри сарфлангани учун ўтган йили шаҳар ҳокими ва ҳокимлик масъуллари анча югур-югур қилишганди. Кўпчиликка пулни қаерга сарфлагани ва қай тартибда харж қилганига жавоб беролмай қийналганди. Энди бу йил ўша хатосини такрорламаслик учун маҳаллий бюджетдан қонуний тартибда маблағ ажратган. Аммо энди бу ҳолатни вилоят ҳокими танқид қилди ва халқнинг пули ҳоким шахсиятини олқишлаш учун сарфланиши керак эмас деди», — дейди «Дарё» мухбири билан суҳбатлашган манба.
Изоҳ (0)