«Ўзбекистон темир йўллари» ва «Қазақстан темир жоли» МК билан келишилган ҳолда 2022 йилда Қозоғистонга яна бир йўловчи поезд ҳаракати ташкил этилмоқда. Бу ҳақда «Ўзбекистон темир йўллари» матбуот хизмати хабар берди.
Маълум қилинишича, 2022 йил 2 майдан бошлаб ҳафтада уч маротаба Олмаота-2—Тошкент—Олмаота-2 йўналишида 1/2-сонли поезд қатнови йўлга қўйилади. Ушбу поезд «Тошкент—Марказий» вокзалидан ҳар сешанба, пайшанба ва якшанба кунлари жадвал асосида Қозоғистонга жўнаб кетади. Ўзбекистон томон эса, «Олмаота-2» темир йўл вокзалидан ҳар душанба, чоршанба ва шанба кунлари қатнайди.
Бошқа қўшни давлатлар билан темир йўл йўналишларининг қайта тикланиши томонларнинг келишувига асосан босқичма-босқич амалга оширилиши кутилмоқда.
Чипталарни электрон тарзда ҳамда темир йўл кассаларидан сотиб олиш мумкин.
Эслатиб ўтамиз, Ўзбекистонда илк бор коронавирус аниқланган 2020 йил 16 мартдан бошлаб темир йўл транспорти қатновлари тўхтатилган эди. 2020 йилнинг 15 августидан маҳаллий авиа ва темир йўл қатновлари босқичма-босқич тикланган. Икки йиллик чекловлардан сўнг, қатор давлатлар томонидан поезд йўловчилари учун давлат чегараларини босқичма-босқич очиш борасида саъйи-ҳаракатлар бошланган. Биринчи халқаро йўловчи поезди 1 апрель кунидан бошлаб Нукус—Бейнеу—Нукус йўналиши бўйича қатнай бошлайди.
Изоҳ (0)