«Аэрофлот» Ўзбекистонга мунтазам авиақатновларни тиклайди

Россиянинг «Аэрофлот» авиакомпанияси Сочидан 17 та йўналиш бўйича рейсларга чипта сотишни бошлади. Бу ҳақда авиакомпания матбуот хизмати хабар берди.

Хусусан, рейслар Арманистон, Миср, Исроил, Қозоғистон, Туркия ва Ўзбекистонга амалга оширилади.

Парвоз дастури транзит йўловчи ташишга қаратилган бўлиб, базавий аэропортлар — Москва («Шереметьево»), Санкт-Петербург ва Красноярскдан Сочи орқали йўловчиларни ташийди.

Парвозлар «Россия» авиакомпанияси («Аэрофлот» гуруҳи таркибидаги) орқали маҳаллий Superjet 100 самолётлари орқали амалга оширилади. Сочида халқаро дастурни қўллаб-қувватлаш учун шу турдаги 10 тагача самолётни жойлаштириш режалаштирилган.

Дунё мамлакатларининг Россияга қўллаётган санкциялари туфайли Россиянинг бир нечта авиакомпаниялари халқаро, жумладан, Ўзбекистонга рейсларни бекор қилганди. Хусусан, 7 март ҳолатига кўра S7 Airlines, iFly, «Аэрофлот», Nordwind, AZUR Air, Smartavia авиакомпанияларининг Ўзбекистонга парвозлари тўхтатилган эди.

Аввалроқ Россия Ўзбекистон ва бошқа бир қатор давлатлар билан коронавирус сабабли ҳаво қатновига қўйилган чекловларни бекор қилганди.