АПЛнинг 2021/22 йилги мавсумдаги энг тезкор футболчиси аниқланди

«Челси» ҳимоячиси Антонио Рюдигер Англия Премьер Лигасининг 2021/22 йилги мавсумдаги энг тезкор футболчиси бўлди.

«Аристократлар» футболчисининг максимал тезлиги 24-турдан ўрин олган «Брайтон»га қарши ўйинда (1:1) 36,7 километр соатни ташкил этди. Бу Премьер Лиганинг жорий мавсумдаги энг юқори кўрсаткичидир.

Рюдигер бу кўрсаткич бўйича соатига 36,6 километр тезликни қайд этган Муҳаммад Салоҳ («Ливерпуль») ва Адам Траорени («Вулперҳемптон», қишки трансферлар ойнаси вақтида ижара асосида «Барселона»га ўтган — «Дарё») ортда қолдирди.

Қайд этиш керак, Траоре кетма-кет уч мавсумдан бери иккинчи ўринни эгаллаб келмоқда. У 2020/21 йилги мавсумда 35,4 км/соат, 2019/20 йилги мавсумда эса 37,6 км/соат тезликда ҳаракатланган.

2021/22 йилги мавсумда Адам Армстронг («Саутҳэмптон») Премьер Лиганинг энг тезкор ўйинчиси бўлганди — 35,6 км/соат.

Маълумот учун, Рюдигер 2017 йилдан бери Лондон клубида тўп суриб келмоқда. У Англия чемпионатининг жорий мавсумида 26 ўйинда майдонга тушиб, 2 та голни ўз номига ёздириб қўйган.