Ижтимоий тармоқларда тирик бўри 1000 долларга сотилаётгани тўғрисида хабар тарқалди. Экология ва атроф-муҳитни муҳофаза қилиш давлат қўмитаси ҳолат юзасидан ўрганиш ишлари олиб борилаётганини маълум қилди.
Telegram’да тарқалган хабарларга кўра, Ҳ.Ҳ. исмли фуқаро табиатдан тутиб олинган соғлом бўрини сотиш бўйича эълон берган.
Маълум қилинишича, Давлат экология қўмитаси томонидан қонун ҳужжатларига биноан ёввойи ҳайвонлардан махсус фойдаланиш учун ҳар йили квота ажратилади. Ёввойи ҳайвонлар табиатдан турли мақсадларда овланади (тутилади).
Бироқ ёввойи ҳайвонларни табиатдан овлаш (тутиш) фақатгина уларнинг яшаш ареалидаги сони ва овлаш мумкин бўлган сонига аниқлик киритилгандан сўнг рухсат этилади.
«Ижтимоий тармоқларда бўрини сотаётган фуқаро Ҳ.Ҳ. томонидан бугунги кунга қадар Давлат экология қўмитасига бўрини табиатдан овлашга доир рухсатнома бериш ҳақида аризаси келиб тушмаган», — дейилади муносабатда.
Давлат экология қўмитаси томонидан қўшимча ўрганиш ишлари давом эттирилмоқда.
Эслатиб ўтамиз, 2021 йилнинг майида Тошкент вилоятида россиялик овчи «Ўзбекистон Қизил китоби»ига киритилган Тяншан қўнғир айиғини Экология қўмитаси раҳбари рухсати билан отиб ўлдиргани маҳаллий жамоатчиликнинг кенг муҳокамаларига сабаб бўлган эди. Унда яна битта Тяншан қўнғир айиғини отишга рухсатнома бор эди. Экология ва атроф-муҳитни муҳофаза қилиш давлат қўмитаси вакили жамоатчилик эътирози инобатга олиниб, овчига иккинчи айиқни отишга рухсат берилмаслигини маълум қилганди.
Изоҳ (0)