Бразилия Олий федерал суди судьяси мамлакатда Telegram мессенжерини блоклаш тўғрисидаги қарорини қайтариб олди. Бунга суд талаби бажарилгани сабаб бўлган, деб хабар беради Г1 портали.
18 март куни Олий федерал суд Telegram мамлакат ҳукумати билан ҳамкорлик қилишдан бош тортаётгани учун уни блоклаш тўғрисида қарор чиқарганди. Telegram асосчиси Павел Дуров узр сўраб чиқиб, компаниянинг электрон почта хатларини йўналтиришда муаммолари юзага келганини маълум қилди. Бразилия президенти Жаир Болсонару мессенжернинг блокланишини номақбул деб атаган.
Шундан сўнг, суд Telegram’га ўз талаблари ижросини таъминлаши учун бир сутка муҳлат берганди. Улар орасида Бразилияда Telegram’нинг расмий вакилини тайинлаш, мамлакат президентининг каналидан тергов сири билан боғлиқ маълумотларга ҳаволалар ва бошқа бир қатор талаблар бор.
Эслатиб ўтамиз, Telegram 2017 йили Индонезияда, 2018 йилда эса Эронда блокланганди. 2021 йилнинг 3 ноябрь куни Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси («Ўзкомназорат») Telegram, YouTube, Instagram, Facebook, «Одноклассники»нинг Ўзбекистондаги фаолиятини чеклади. Кейинроқ Ўзбекистон бош вазири Абдулла Ариповнинг қарорига асосан «Ўзкомназорат» бошлиғи Ғолибшер Зияев нотўғри ва келишилмаган хатти-ҳаракатлари учун эгаллаб турган вазифасидан четлатилгани маълум бўлди ва ижтимоий тармоқларга уланиш тикланди.
Изоҳ (0)