Ҳиндистон денгизга чиқиш имкони бўлмаган Ўзбекистонга биринчи марта Покистон ва Афғонистон орқали тижорат товарларини экспорт қилди.
140 тонна юкка эга бўлган, асосан, ҳинд шакарини олиб кетаётган юк машиналари 16 март куни Кобулдан Ўзбекистон пойтахти Тошкентга жўнаб кетди, деб хабар қилади «Толибон» саноат ва савдо вазирлиги матбуот котиби.
Тижорий юк Ҳиндистоннинг Мумбай шаҳридан йўлга чиққан ва шу ой бошида Покистоннинг Карачи денгиз порти орқали ўтиб, Покистон ва Ўзбекистон ўртасида яқинда имзоланган икки томонлама транзит савдо битимига кўра Ўзбекистонга етказилган.
Ўзбекистон президенти Шавкат Мирзиёев март ойи бошида Покистон пойтахти Исломободга икки кунлик расмий ташрифи чоғида бир қатор келишувларни имзолаган эди.
Покистон томонининг таъкидлашича, Ўзбекистонга йўл олган Ҳиндистон тижорий жўнатмалари келишув бўйича хусусий уюштирилган фаолият бўлиб, тўртта давлатнинг ҳеч бирида ҳукумат иштироки йўқ.
Энди бу мунтазам фаолиятга айланиши ва Ўзбекистон Покистон денгиз портлари орқали исталган жойдан товарларни олиб кириши мумкин бўлиши айтилмоқда.
Расмийлар томонидан «Толибон» ҳукумати савдо фаолиятини осонлаштириши шартлиги, чунки Ўзбекистон ҳам денгизга чиқиш имкони бўлмаган Афғонистон каби халқаро савдони амалга ошириш учун Покистон портларига кириш ҳуқуқига эга эканлиги таъкидланмоқда.
Аввалроқ Покистон Ўзбекистонга мол гўшти етказиб беришни бошлагани ҳақида хабар берилган эди.
Изоҳ (0)