Сўм 6,8 фоизга қадрсизланди. Марказий банк кўрилаётган чоралар ҳақида гапирди

Йил бошидан бери сўм АҚШ долларига нисбатан 6,8 фоизга қадрсизланди. Бу Марказий банк хабарида қайд этилди.

«Миллий валюта курси ташқи хатарлар ва девалвацион босимлар таъсирларига жавобан тўғриланиш рўй берди», — дейилади хабарда.

Шу муносабат билан, Марказий банк ички валюта бозоридаги интервенция ҳажмини оширди.

Ушбу операциялар «нейтраллик тамойиллари» асосида амалга оширилади – яъни олтин-валюта захиралари ҳисобига эмас, балки ўтган йили жамғарилган қўшимча захиралар ҳисобига.  

Бу чоралар валюта курси ва умумий бозор барқарорлигини таъминлаши кутилмоқда. 

Яна қандай ишлар қилинмоқда?

Банк тизимини зарурий ликвидлик билан таъминлаш мақсадида банкларга Марказий банк томонидан қисқа муддатли ликвидлик чекловларсиз (RЕPО ва CBOP операциялари орқали) тақдим этиб борилади.

Марказий банк томонидан муомалага чиқариладиган қисқа муддатли облигациялар ойлик ўртача қолдиғи бўйича лимитлар 20 трлн сўмгача оширилди.

Банкларга жорий йилнинг 1 июлига қадар:

• чакана операциялар бўйича валюта курсларини белгилашда валюта биржасида Call-аукцион натижасида шаклланган валюта курсидан фойдаланиш имконияти берилди;
• тижорат банклари томонидан аукционларда харид қилинадиган Марказий банк облигациялари бўйича фоиз ставкалари даражаси асосий ставканинг юқори чегарасигача кенгайтирилди;
• икки ҳафталик депозит аукционлари бўйича лимитлар бекор қилинди.

Шу билан биргаликда, Марказий банк макроиқтисодий ривожланиш прогнози ташқи иқтисодий вазиятни инобатга олган ҳолда қайта кўриб чиқмоқда.

Бунда, инфляцион ва девалвацион кутилмаларнинг пасайиши, ички макроиқтисодий шароитларга ташқи босимларнинг пасайиши билан асосий ставка даражаси босқичма-босқич пасайтириб борилади.

Аввалроқ Ўзбекистонда асосий ставка 2004 йилдан бери биринчи марта 16 фоиздан ошгани ҳақида хабар берилган эди.