Бир неча кундан буён давом этаётган ёғингарчилик оқибатида Андижон вилоятидаги айрим кўчалар, хонадонлар сувга тўлган, шунингдек, айрим кўчаларда автомобиллар ҳаракати маълум вақтга чекланган. «Дарё» ёмғир остидаги Андижон суратларини жамлади.
Андижон шаҳар Фавқулодда вазиятлар бўлими ходими Азизбек Ёрқуловнинг айтишича, 2022 йилнинг 15 март куни кучли ёмғир ёғиши сабабли, Андижон шаҳрининг бир нечта ҳудудларида ва йўл ёқаларидаги ариқларда сув тўпланиши кузатилган. Тўпланган сувлар аҳоли турар жойлари ва йўл бўйларидаги бино-иншоотларга кириб кетишининг олдини олиш мақсадида вилоят ҳокими — Фуқаро муҳофазаси бошлиғи буйруғи билан ишчи гуруҳ тузилиб, ҳар бир ҳудудга масъул шахслар тайинланган.
15—16 март кунлари Андижон шаҳар Фавқулодда вазиятлар бўлими, Сув оқава, Тоза ҳудуд унитар корхонаси, Автойўл бошқармаси ва Ободонлаштириш бошқармаларининг 20 га яқин махсус техникалари ёрдамида шаҳар кўчалари ва кўп қаватли уйлар ертўласига тўпланган сувлар тортиб олиниб, йўл бўйларидаги бино-иншоотларга кириб кетишининг олдини олинган.
Қўшимча қилинишича, сув тўлиши сабаб, шаҳарнинг Амир Темур шоҳкўчаси (темир йўл вокзали ҳудуди), Шароф Рашидов кўчаси (Болалар боғи рўпараси) ҳамда Бобур шоҳкўчаси (ФВБ биноси олди)да автомобилларнинг ҳаракати вақтинча тўхтатилган.
Андижон тумани ҳокимлигининг маълум қилишича, ёғингарчилик оқибатида туманнинг «Саноат» маҳалласидаги Омад кўчасида яшовчи Раҳимовлар ҳамда «Бобоғози» маҳалласининг Чорбоғ кўчасида яшовчи Жўраевларнинг яшаш хонадонлари ҳовлисида йиғилиб қолган сувлар Фавқулодда вазиятлар бўлими ходимлари томонидан бартараф этилган.
Шунингдек, Балиқчи туманининг «Оққўрғон», «Авесто» маҳаллаларида вужудга келган фавқулодда ҳолатлар техникалар жалб этилган ҳолда бартараф этилган.
Изоҳ (0)